سوتے وقت آئی ماسک استعمال کرنے کے حیرت انگیز فوائد!

لاہور:(پاک ترک نیوز)کیا آپ یقین کریں گے کہ سونے سے پہلے صرف آنکھوں پر ایک سادہ سا ماسک پہن لینے سے آپ کی یادداشت تیز، دماغ زیادہ چوکنا اور اگلا دن پہلے سے کہیں زیادہ موثر ہو سکتا ہے۔
یہ کوئی ٹوٹکا نہیں، کوئی سوشل میڈیا دعویٰ نہیں، بلکہ سائنسی تحقیق سے ثابت شدہ حقیقت ہے۔ ماہرین کا کہنا ہے کہ آئی ماسک پہن کر سونے والے افراد ناصرف بہتر نیند لیتے ہیں بلکہ ان کی یادداشت مضبوط ہو جاتی ہے اور وہ اگلے دن ذہنی آزمائشوں میں زیادہ بہتر کارکردگی دکھاتے ہیں۔
حال ہی میں کی گئی ایک تحقیق میں انکشاف ہوا ہے کہ نیند کے دوران روشنی کا آنکھوں تک پہنچنا دماغی افعال کو متاثر کرتا ہے۔
آئی ماسک اس روشنی کو روک دیتا ہے، جس کے نتیجے میں دماغ زیادہ گہرے اور موثر انداز میں کام کرتا ہے۔اس تحقیق میں 122 افراد کو شامل کیا گیا۔
پہلے تجربے میں 18 سے 35 سال کی عمر کے 89 افراد کو ایک ہفتے تک سوتے وقت آئی ماسک پہننے کا کہا گیا، اور اگلے ہفتے بغیر ماسک کے سونے کی ہدایت دی گئی۔ نتائج حیران کن تھے۔
آئی ماسک پہننے والے افراد نے یادداشت اور ذہنی صلاحیت جانچنے والے ٹیسٹس میں واضح طور پر بہتر نتائج دیے، جبکہ ان کا ردِعمل کا وقت بھی تیز ہو گیا۔
دوسرے تجربے میں 33 افراد کو ایک رات آئی ماسک کے ساتھ اور ایک رات بغیر ماسک کے سلایا گیا۔ خصوصی ڈیوائسز کے ذریعے ان کے دماغی سگنلز اور روشنی پر ردِعمل کا جائزہ لیا گیا۔
نتائج نے ثابت کر دیا کہ آئی ماسک پہننے سے نئی یادیں بنانے اور نیا سیکھنے جیسے اہم دماغی افعال میں نمایاں بہتری آتی ہے۔ماہرین کے مطابق، اگر آپ اپنی نیند، یادداشت اور روزمرہ کارکردگی بہتر بنانا چاہتے ہیں تو شاید حل بہت سادہ ہے۔ سونے سے پہلے صرف آنکھوں پر ماسک پہن لیجیے اور اپنے دماغ کو بہترین موقع دیجیے۔