کراچی(پاک ترک نیوز ) سندھ میں منکی پاکس سے متاثرہ ڈیڑھ سالہ بچہ جاں بحق ہوگیا، جس کے بعد صوبے میں اس بیماری سے ہونے والی اموات کی تعداد 12 ہوگئی، رواں سال سندھ میں منکی پاکس کے مجموعی طور پر 98 کیسز رپورٹ ہوچکے ہیںاسپتال کے ترجمان کے مطابق بچے کو چند روز قبل ایک نجی اسپتال سے متعدی امراض کے لیے مختص نیپا اسپتال منتقل کیا گیا تھا، جہاں وہ زیرِ علاج تھا۔ ترجمان نے تصدیق کی کہ ڈیڑھ سالہ بچے کی موت منکی پاکس کے باعث ہوئی۔محکمہ صحت سندھ کے مطابق گزشتہ ایک ہفتے کے دوران صوبے میں منکی پاکس کے 7 نئے کیسز رپورٹ ہوئے ہیں، جس کے بعد متاثرہ افراد سے رابطے میں آنے والے افراد کی نشاندہی، نگرانی اور طبی دیکھ بھال کے اقدامات مزید سخت کردیے گئے۔
یہ بھی پڑھیں: امریکہ کا ایران پر رواں ہفتے کے آخر میں بڑے حملے کا امکان
حکام کے مطابق ایم پاکس کی روک تھام کے لیے متاثرہ افراد سے رابطے میں آنے والوں کا سراغ لگانے اور ان کی صحت کی نگرانی کا عمل جاری ہے۔ سرکاری اور نجی طبی مراکز کو بھی انفیکشن سے بچاؤ اور اس پر قابو پانے کے اقدامات پر سختی سے عمل درآمد کی ہدایت کی گئی ہے۔محکمہ صحت نے شہریوں کو ہدایت کی ہے کہ مشتبہ یا متاثرہ مریضوں کے زیرِ استعمال تولیوں، کپڑوں، بستر اور دیگر ذاتی اشیا سے براہِ راست رابطے سے گریز کریں تاکہ بیماری کے پھیلاؤ کو روکا جاسکے۔
