ابو ظہبی ( پاک ترک نیوز) متحدہ عرب امارات کے مرکزی بینک نے منی لانڈرنگ اور دہشت گردی کی مالی معاونت روکنے کے قوانین کی سنگین خلاف ورزیوں پر ایک غیر ملکی بینک کی مقامی برانچ پر 2 کروڑ درہم کا بھاری جرمانہ عائد کر دیا۔
مرکزی بینک کی جانب سے جاری بیان کے مطابق یہ جرمانہ وفاقی قانون برائے مرکزی بینک اور مالیاتی اداروں کی تنظیم سے متعلق دفعات کے تحت عائد کیا گیا۔ کارروائی بینک کے معاملات کی جانچ پڑتال کے دوران سامنے آنے والی سنگین اور بار بار دہرائی جانے والی خامیوں کی بنیاد پر کی گئی۔
بیان میں کہا گیا ہے کہ تحقیقات کے دوران معلوم ہوا کہ مذکورہ بینک کی برانچ منی لانڈرنگ، دہشت گردی کی مالی معاونت، غیر قانونی تنظیموں کی فنڈنگ اور پابندیوں سے متعلق قواعد و ضوابط پر مؤثر عملدرآمد میں ناکام رہی، جس کے باعث بینکنگ نظام کے لیے خطرات پیدا ہوئے۔
یہ بھی پڑھیں: متحدہ عرب امارات میں پرائیویٹ ملازمین کو یکم تاریخ کو سیلری ملے گا
مرکزی بینک نے ادارے کے خلاف کارروائی کے ساتھ ساتھ بینک کے ہیڈ آف کمپلائنس اور منی لانڈرنگ رپورٹنگ آفیسر پر بھی تین لاکھ درہم جرمانہ عائد کیا۔حکام کے مطابق متعلقہ افسر اپنے فرائض اور ذمہ داریوں کی ادائیگی میں ناکام رہے، جس کے باعث ضابطہ جاتی تقاضوں کی خلاف ورزیاں سامنے آئیں۔
