لاہور(پاک ترک نیوز ) پاکستان کرکٹ بورڈ نے سری لنکا کے خلاف دو ٹیسٹ میچوں کی سیریز کے لیے 14 رکنی قومی اسکواڈ کا اعلان کر دیا، بابر اعظم کو ٹیم کی قیادت سونپ دی گئی جبکہ سابق کپتان شان مسعود اور وکٹ کیپر محمد رضوان سمیت کئی اہم کھلاڑی اسکواڈ میں جگہ بنانے میں ناکام رہے۔
پاکستان کرکٹ بورڈ کی جانب سے اعلان کردہ اسکواڈ میں نوجوان کھلاڑیوں کو بھرپور موقع دیا گیا ہے۔ سمیر منہاس، محمد طحہ اور محمد سلیمان کو پہلی مرتبہ قومی ٹیسٹ اسکواڈ میں شامل کیا گیا ہے۔
سری لنکا کے خلاف ٹیسٹ سیریز کے لیے سابق کپتان شان مسعود، محمد رضوان، امام الحق، عبداللہ شفیق، فاسٹ بولر محمد علی اور خرم شہزاد کو اسکواڈ سے باہر رکھا گیا ہے۔
اعلان کردہ قومی ٹیسٹ اسکواڈ میں کپتان بابر اعظم کے علاوہ عبداللہ فضل، عرفات منہاس، اذان اویس، محمد عباس، رضا اللہ، سعود شکیل، سلمان علی آغا اور بائیں ہاتھ کے اسپنر علی عثمان شامل ہیں۔
وکٹ کیپنگ کے شعبے میں غازی غوری اور سعد بیگ کو اسکواڈ کا حصہ بنایا گیا ہے جبکہ سمیر منہاس، محمد طحہ اور محمد سلیمان بھی ٹیم میں شامل ہیں۔
پاکستان کرکٹ بورڈ نے سری لنکا کے خلاف تین روزہ وارم اپ میچ کے لیے 13 رکنی پیٹرنز الیون کا بھی اعلان کر دیا ہے، جس کی قیادت سعد بیگ کریں گے۔
پیٹرنز الیون میں عبداللہ فضل، علی عثمان، اذان اویس، محمد سلیمان، محمد طحہ، سمیر منہاس، محمد سلمان، شعیب اختر جونیئر، علی شبیر، ثاقب خان، عبید شاہ اور محمد طیب عارف شامل ہیں۔
کرکٹ بورڈ کے مطابق وارم اپ میچ کے اختتام پر پیٹرنز الیون میں شامل مزید دو فاسٹ بولرز کو قومی ٹیسٹ اسکواڈ کا حصہ بنایا جائے گا۔
پاکستان اور سری لنکا کے درمیان تین روزہ وارم اپ میچ 4 سے 6 نومبر تک اسلام آباد کلب میں کھیلا جائے گا۔
دونوں ٹیموں کے درمیان پہلا ٹیسٹ میچ 9 سے 13 نومبر تک راولپنڈی کرکٹ اسٹیڈیم میں ہوگا جبکہ دوسرا اور آخری ٹیسٹ 17 سے 21 نومبر تک لاہور کے قذافی اسٹیڈیم میں کھیلا جائے گا۔
