کراچی ( پاک ترک نیوز) کراچی: نوجوان تاجر میر رضا کے بینک کھاتوں اور مالی لین دین کی تفصیلات کے حصول کے لیے تفتیشی ٹیم نے سندھ ہائیکورٹ سے رجوع کرلیا۔عدالت میں تفتیشی ٹیم کی درخواست پر سماعت ہوئی، جس کے دوران عدالت نے اسٹیٹ بینک سے یکم اکتوبر تک جواب طلب کرلیا۔سماعت کے دوران عدالت نے استفسار کیا کہ میر رضا کے بینک لین دین کی تفصیلات کیوں حاصل کرنا چاہتے ہیں؟
تفتیشی حکام نے بتایا کہ میر رضا کے قتل کی تحقیقات جاری ہیں اور یہ معلوم کرنا چاہتے ہیں کہ رقم کی لین دین کہاں اور کن افراد کے ساتھ ہوتی رہی۔عدالت نے استفسار کیا کہ بینک سے لین دین کی رپورٹ حاصل کرلی جائے۔سرکاری وکیل نے عدالت کو بتایا کہ اسٹیٹ بینک حکام سے رابطہ کیا گیا تھا، تاہم حکام کا کہنا ہے کہ عدالتی حکم کے بعد ہی کارروائی کی جاسکتی ہے۔تفتیشی حکام نے بتایا کہ انہیں یہ بھی معلوم نہیں کہ میر رضا کے کتنے بینک کھاتے تھے اور وہ کن بینکوں میں موجود تھے، اسی لیے اسٹیٹ بینک سے رابطہ کیا گیا۔سرکاری وکیل نے عدالت سے استدعا کی کہ میر رضا کے بینک کھاتوں اور مالی لین دین کی مکمل تفصیلات فراہم کرنے کا حکم دیا جائے۔تفتیشی حکام کے مطابق وہ یہ معلوم کرنا چاہتے ہیں کہ میر رضا کے کتنے بینک کھاتے تھے اور ان میں مالی لین دین کہاں کہاں ہوا۔تفتیشی حکام نے مؤقف اختیار کیا کہ بینک کھاتوں اور لین دین کی تفصیلات میر رضا کے قتل کی جاری تحقیقات میں معاون ثابت ہوسکتی ہیں۔
یہ بھی پڑھیں: زرِ مبادلہ کے ذخائر 21 ارب 40 کروڑ ڈالر کی بلند ترین سطح پر پہنچ گئے، وزیراعظم کا اظہارِ تشکر
عدالت نے اسٹیٹ بینک سے جواب طلب کرتے ہوئے سماعت یکم اکتوبر تک ملتوی کردی۔
