کراچی(پاک ترک نیوز) عمرہ زائرین کے لیے گردن توڑ بخار اور انفلوئنزا کی ویکسین کی خریداری میں مبینہ بے ضابطگیوں کے باعث عمومی ویکسینیشن بند کر دی گئی، جبکہ کراچی ایئرپورٹ پر قائم بارڈر ہیلتھ سروسز کا ہنگامی ویکسینیشن کاؤنٹر بھی ہٹا دیا گیا۔
ذرائع کے مطابق سعودی عرب جانے والے مسافروں کے لیے لازمی ویکسین کی خریداری میں مبینہ بے ضابطگیوں کے بعد ویکسین کی عمومی فراہمی معطل کر دی گئی ہے، جس کے باعث عمرہ زائرین کو مشکلات کا سامنا کرنا پڑ سکتا ہے۔
ذرائع کا کہنا ہے کہ اس وقت ویکسین کی صرف چار ہزار خوراکیں موجود ہیں، جنہیں نادرا کی پاک شناخت ایپ کے ذریعے پیشگی فیس ادا کرنے والے مسافروں کے لیے مختص کر دیا گیا ہے۔
ایئرپورٹ ڈسپنسری میں صرف ان مسافروں کو ویکسین لگائی جا رہی ہے جو پہلے ہی ویکسینیشن کی فیس جمع کروا چکے ہیں، جبکہ دیگر مسافروں کے لیے عمومی ویکسینیشن کی سہولت بند ہے۔
ذرائع کے مطابق ویکسین کی قلت اور انتظامی مسائل کے باعث کراچی ایئرپورٹ پر ہنگامی ویکسینیشن کے لیے قائم بارڈر ہیلتھ سروسز کا کاؤنٹر بھی ہٹا دیا گیا ہے۔
اس کے علاوہ ایئرپورٹ ڈسپنسری میں تعینات بیشتر عملے کو بھی فارغ کر دیا گیا ہے اور اس وقت صرف ایک ڈسپنسر اور ایک اہلکار خدمات انجام دے رہے ہیں۔
ذرائع نے بتایا کہ ویکسینیشن پروگرام کے لیے یومیہ اجرت پر تعینات نوجوانوں کو بھی اگلے احکامات تک ڈیوٹی پر نہ آنے کی ہدایت کر دی گئی ہے۔
واضح رہے کہ عمرہ زائرین کے لیے ویکسینیشن لازمی کرانے کی آخری تاریخ میں چند روز قبل جاری کیے گئے نئے احکامات کے تحت 20 نومبر تک توسیع کی گئی تھی۔
