جوہری ہتھیار نہیں بنا رہے، ہر معائنے کو تیار ہیں، مگر دباؤ قبول نہیں کریں گے: ایران

تہران : (پاک ترک نیوز)ایران کے صدر مسعود پزشکیان نے اعلان کیا ہے کہ تہران اپنے جوہری پروگرام کے حوالے سے کسی بھی قسم کی جانچ پڑتال کے لیے تیار ہے اور ایران کا جوہری ہتھیار بنانے کا کوئی ارادہ نہیں ہے۔
اسلامی انقلاب کی 47ویں سالگرہ کے موقع پر خطاب کرتے ہوئے انہوں نے کہا کہ ایران بارہا واضح کر چکا ہے کہ وہ ایٹمی ہتھیار حاصل کرنے کا خواہاں نہیں اور اس مؤقف کو ثابت کرنے کے لیے ہر قسم کی تصدیقی عمل قبول کرنے کو تیار ہے۔
یہ بیان ایسے وقت میں سامنے آیا ہے جب امریکا کے ساتھ دوبارہ مذاکرات کا سلسلہ شروع ہو چکا ہے اور خطے میں کشیدگی اور فوجی دھمکیوں کا ماحول موجود ہے۔
صدر پزشکیان نے واضح کیا کہ ایران کسی بھی "غیر ضروری یا حد سے بڑھے ہوئے مطالبات” کے آگے نہیں جھکے گا۔ ان کا کہنا تھا کہ ایران جارحیت کے سامنے سر نہیں جھکائے گا، تاہم ہمسایہ ممالک کے ساتھ مکالمہ جاری رکھا جائے گا تاکہ خطے میں امن اور استحکام کو فروغ دیا جا سکے۔
انہوں نے اس عزم کا اعادہ کیا کہ ایران مذاکرات کے ذریعے مسائل کے حل کا خواہاں ہے، لیکن قومی مفادات پر کسی قسم کا سمجھوتہ قبول نہیں کیا جائے گا۔