لندن (پاک ترک نیوز )جی سیون ممالک نے ایران کے جوہری پروگرام پر عالمی خدشات دور کرنے اور مسئلے کا سفارتی حل تلاش کرنے پر زور دیا ہے، سفارتی پیش رفت نہ ہونے کی صورت میں تہران پر دباؤ برقرار رکھنے کا اعلان بھی کیا ہے۔
جی سیون کے جاری کردہ اعلامیے میں آبنائے ہرمز میں تجارتی جہازوں کی آزادانہ اور محفوظ آمدورفت یقینی بنانے کا مطالبہ کیا گیا ہے۔ اعلامیے کے مطابق فرانس اور برطانیہ کی قیادت میں آبنائے ہرمز میں بحری آمدورفت بحال کرنے کی کوششوں کی حمایت کی جائے گی۔
دوسری جانب جی سیون ممالک نے روس اور یوکرین کے درمیان جنگ بندی کی اپیل کرتے ہوئے جامع اور باہمی جنگ بندی پر زور دیا ہے۔
اعلامیے میں یوکرین کی خودمختاری اور علاقائی سالمیت کی حمایت کا اعادہ کیا گیا ہے، جبکہ روس اور یوکرین دونوں پر توانائی کی تنصیبات اور بحیرہ اسود میں حملے روکنے پر بھی زور دیا گیا ہے۔
جی سیون ممالک نے یورپ کی سلامتی کے مستقبل سے متعلق فیصلوں میں یورپی ممالک کی شمولیت کو بھی ضروری قرار دیا ہے۔
