پشاور(پاک ترک نیوز)خیبرپختونخوا میں دہشت گردوں کے خلاف سکیورٹی فورسز کی کارروائیاں تیز، میر علی اور اورکزئی میں انٹیلی جنس بیسڈ آپریشنز کے دوران 43 خوارج ہلاک، متعدد ٹھکانے تباہ کردیے گئے۔
آئی ایس پی آر کے مطابق سیکیورٹی فورسز نے گزشتہ 48 گھنٹوں کے دوران میر علی اور ضلع اورکزئی میں دہشت گردوں کے متعدد ٹھکانوں کو مؤثر کارروائیوں کا نشانہ بنایا۔
میر علی میں شدید فائرنگ کے تبادلے کے دوران بھارتی سرپرستی میں سرگرم فتنہ الخوارج کے 35 دہشت گرد ہلاک کیے گئے، جبکہ اورکزئی میں مزید 8 خوارج مارے گئے۔
آئی ایس پی آر کے مطابق دونوں کارروائیوں میں مجموعی طور پر 43 دہشت گرد ہلاک ہوئے، جبکہ کلیئرنس آپریشن کے دوران بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا۔
برآمد ہونے والے مواد میں دیسی ساختہ دھماکا خیز مواد اور آئی ای ڈیز بھی شامل ہیں، سیکیورٹی فورسز نے دہشت گردوں کی تخریبی کارروائیوں کے لیے دھماکا خیز مواد استعمال کرنے کی کوششیں ناکام بنادیں۔
ترجمان پاک فوج کے مطابق میر علی اور اورکزئی میں باقی ماندہ دہشت گردوں کے خاتمے کے لیے کلیئرنس آپریشن جاری ہے۔
یہ بھی پڑھیں: سندھ حکومت کا سرکاری گاڑیاں مرحلہ وار الیکٹرک وہیکلز پر منتقل کرنے کا فیصلہ
آئی ایس پی آر کا کہنا ہے کہ عزمِ استحکام کے تحت ملک سے دہشت گردی کے مکمل خاتمے تک سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔
