کوئٹہ (پاک ترک نیوز )کوہ سلیمان کے پہاڑی علاقے میں سی ٹی ڈی کی بڑی کارروائی، فائرنگ کے تبادلے میں ایک اہم کمانڈر سمیت 2 دہشت گرد ہلاک کر دیئے گئے۔
ترجمان سی ٹی ڈی پنجاب کے مطابق خفیہ اطلاعات پر کارروائی کے دوران ہلاک ہونے والے دہشت گردوں کا تعلق کالعدم ٹی ٹی پی سے تھا۔
ترجمان کے مطابق تمن قیصرانی کے قبائلی علاقے میں 12 سے 15 مسلح دہشت گردوں کی موجودگی کی مصدقہ اطلاع تھی۔
دہشت گرد تحصیل کوہ سلیمان، وہوا اور تونسہ کے آباد علاقوں میں تخریب کاری کی منصوبہ بندی کر رہے تھے۔
حکام کے مطابق سی ٹی ڈی نے جدید ہتھیاروں، نگرانی کے آلات اور ڈرون ٹیکنالوجی کی مدد سے دہشت گردوں کا سراغ لگایا۔
ترجمان سی ٹی ڈی پنجاب نے کہا جنڈوگا کے قریب دشوار گزار پہاڑی علاقے میں رات بھر خفیہ نگرانی کے بعد ایکشن لیا گیا۔
شدید کراس فائرنگ کے دوران 2 دہشت گرد ہلاک جبکہ 2 زخمی حالت میں اپنے ساتھیوں سمیت پسپا ہو گئے۔
ترجمان کے مطابق ہلاک دہشت گردوں کی شناخت کا عمل جاری ہے، فرار عناصر کی گرفتاری کے لیے وسیع سرچ اور سویپ آپریشن شروع کر دیا گیا
