تہران(پاک ترک نیوز ) ایرانی پارلیمنٹ کی قومی سلامتی و خارجہ پالیسی کمیٹی کے ترجمان ابراہیم رضائی نے کہا ہے کہ ایران اب کسی بھی شرارت یا خطے میں عدم استحکام پیدا کرنے کی کوشش پر مزید تحمل کا مظاہرہ نہیں کرے گا۔
ابراہیم رضائی نے کہا کہ ایران خطے میں تزویراتی توازن قائم رکھنے کے عمل میں سرگرم ہے اور قومی مفادات کے تحفظ کے لیے ہر ضروری اقدام کرے گا۔ ان کا کہنا تھا کہ ایران کی نئی پالیسی سے امریکیوں کو کچھ تکلیف ضرور ہوگی، تاہم انہیں اس صورتحال کا عادی ہونا پڑے گا۔
انہوں نے زور دیا کہ ایران اپنی سلامتی، خودمختاری اور علاقائی استحکام کے حوالے سے کسی قسم کی مداخلت یا اشتعال انگیزی کو برداشت نہیں کرے گا۔
واضح رہے کہ چند روز قبل بھی ابراہیم رضائی نے امریکا پر سخت تنقید کرتے ہوئے کہا تھا کہ امریکیوں نے ثابت کر دیا ہے کہ وہ سفارت کاری کی نہیں بلکہ میزائلوں کی زبان بہتر سمجھتے ہیں۔
سماجی رابطے کی ویب سائٹ ایکس پر جاری اپنے بیان میں انہوں نے ایرانی مسلح افواج، بالخصوص اسلامی انقلابی گارڈ کور کی بحری اور فضائی فورسز کی کارکردگی کو سراہتے ہوئے انہیں خراجِ تحسین پیش کیا تھا۔
تجزیہ کاروں کے مطابق ایرانی حکام کے حالیہ بیانات خطے میں بڑھتی ہوئی کشیدگی اور ایران و امریکا کے درمیان جاری تناؤ کے تناظر میں اہمیت رکھتے ہیں، جن سے ظاہر ہوتا ہے کہ تہران اپنی دفاعی اور خارجہ پالیسی کے حوالے سے سخت مؤقف برقرار رکھنے کا ارادہ رکھتا ہے۔
