راولپنڈی (پاک ترک نیوز)بلوچستان میں بھارتی سرپرستی میں سرگرم دہشتگردوں کے خلاف سکیورٹی فورسز کی کارروائیاں جاری ہیں، 21 ستمبر سے اب تک 33 دہشتگرد ہلاک کیے جا چکے ہیں۔
آئی ایس پی آر کے مطابق آپریشن شعبان کے دوران سکیورٹی فورسز نے دہشتگردوں کے متعدد ٹھکانے تباہ کر دیے، شدید فائرنگ کے تبادلے میں مزید 5 دہشتگرد مارے گئے۔
آئی ایس پی آر کا کہنا ہے کہ آپریشن شعبان کے دوران اب تک 22 دہشتگرد ہلاک ہو چکے ہیں، جبکہ دہشتگردوں کے ٹھکانوں سے اسلحہ، گولہ بارود اور دھماکا خیز مواد بھی برآمد کیا گیا۔
دوسری جانب 25 ستمبر کو نوشکی میں خفیہ اطلاع پر کارروائی کی گئی، سیکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا۔
نوشکی آپریشن کے دوران شدید فائرنگ کے تبادلے میں 11 دہشتگرد ہلاک ہوئے۔
آئی ایس پی آر کے مطابق علاقے سے دہشتگردی کے خطرے کے مکمل خاتمے تک صفائی کا آپریشن جاری رہے گا۔
ترجمان پاک فوج کا کہنا ہے کہ غیر ملکی سرپرستی اور معاونت سے ہونے والی دہشتگردی کے مکمل خاتمے تک سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔
وژن عزمِ استحکام کے تحت ملک سے دہشتگردی کے ناسور کے خاتمے کے لیے انسدادِ دہشتگردی کی مہم بھرپور رفتار سے جاری رہے گی۔
