لاہور( پاک ترک نیوز) پنجاب میں مون سون کے آخری مرحلے کے دوران بارش نے موسم کا رنگ بدل دیا، کئی شہروں میں گرج چمک کے ساتھ موسلادھار بارش ہوئی جبکہ تیز ہواؤں کے باعث گرمی کا زور ٹوٹ گیا اور موسم خوشگوار ہوگیا۔لاہور میں صبح سے ہی بادلوں کی آنکھ مچولی جاری رہی، مختلف علاقوں میں گرج چمک کے ساتھ بارش ہوئی، جس کے بعد موسم خوشگوار ہوگیا۔ ٹھنڈی ہواؤں نے شہریوں کو گرمی اور حبس سے وقتی ریلیف فراہم کیا۔بہاولپور، بہاولنگر اور ڈیرہ غازی خان میں بھی بادل خوب برسے۔ گرج چمک کے ساتھ ہونے والی بارش سے سڑکیں اور نشیبی علاقے زیرِ آب آنے کا خدشہ پیدا ہوگیا، جبکہ شہریوں نے خوشگوار موسم کا لطف اٹھایا۔
رحیم یار خان، پیرمحل، پتوکی، ننکانہ صاحب اور چونیاں میں بھی بارش ہوئی، کئی علاقوں میں تیز ہواؤں کے ساتھ بارش کا سلسلہ جاری رہا۔لودھراں، خانپور اور میاں چنوں میں بھی بادل برس پڑے، بارش کے باعث درجہ حرارت میں کمی اور موسم میں خنکی محسوس کی گئی۔محکمہ موسمیات کے مطابق بارشوں کے اس سلسلے کے دوران بعض علاقوں میں گرج چمک، تیز ہواؤں اور موسلادھار بارش کا امکان برقرار ہے، جبکہ نشیبی علاقوں میں پانی جمع ہونے کا خدشہ بھی ظاہر کیا گیا ہے۔انتظامیہ اور متعلقہ اداروں کو بارش کے دوران نکاسی آب کے انتظامات یقینی بنانے اور شہریوں کو ممکنہ مشکلات سے بچانے کے لیے الرٹ رہنے کی ہدایت کی گئی ہے۔
یہ بھی پڑھیں: پاکستان ہاکی ٹیم کا بھارت جانے سے انکار، میچز وینیو بدلنے کی درخواست مسترد
پنجاب کے مختلف علاقوں میں بارش سے جہاں گرمی اور حبس میں کمی آئی، وہیں کسانوں اور شہریوں نے بھی خوشگوار موسم کا خیرمقدم کیا۔
