اسلام آباد(پاک ترک نیوز ) وفاقی وزیر خزانہ سینیٹر محمد اورنگزیب نے کہا ہے کہ سعودی عرب کے ساتھ 3 ارب ڈالر کے قرض کا معاملہ رول اوور ہو چکا ہے اور قرض کی واپسی مناسب وقت تک مؤخر کر دی گئی ہے۔
پارلیمنٹ ہاؤس میں میڈیا سے گفتگو کرتے ہوئے وزیر خزانہ نے کہا کہ ان کی سعودی وزیر خزانہ کے ساتھ بھی انتہائی اچھی ملاقات ہوئی ہے۔ سعودی عرب کے ساتھ پاکستان کے تعلقات جس نوعیت کے ہیں، اس تناظر میں پریشان ہونے کی ضرورت نہیں۔
محمد اورنگزیب کا کہنا تھا کہ فی الحال سعودی عرب کی جانب سے مزید مالی معاونت کی ضرورت نہیں، کیونکہ پاکستان کے پاس تین ماہ کا درآمدی اخراجات پورے کرنے کے لیے زرمبادلہ موجود ہے۔
وزیر خزانہ نے بتایا کہ پاکستان کو ہر سال تقریباً ڈیڑھ ارب یورو بانڈ کی ادائیگی کرنا ہوتی ہے۔ حکومت کی کوشش ہے کہ ان ادائیگیوں کے لیے پیشگی انتظامات کیے جائیں تاکہ مقررہ وقت پر ادائیگی میں کسی قسم کی دشواری پیش نہ آئے۔
انہوں نے مزید کہا کہ عالمی مالیاتی فنڈ کے ایگزیکٹو بورڈ سے پاکستان کے لیے اگلی قسط کی منظوری دسمبر میں متوقع ہے۔
