پشاور( پاک ترک نیوز) پشاور کی کنزیومر کورٹ نے کپڑوں کی خریداری کے موقع پر برانڈڈ شاپنگ بیگ کے اضافی 30 روپے وصول کرنے کو غیر قانونی قرار دیتے ہوئے معروف برانڈ پر 25 ہزار روپے جرمانہ عائد کردیا۔
کنزیومر کورٹ جج نصراللہ گنڈاپور نے خاتون کی درخواست پر تحریری فیصلہ جاری کردیا۔عدالت نے متعلقہ برانڈ کو خاتون کو 25 ہزار روپے معاوضہ ادا کرنے کے ساتھ شاپنگ بیگ کی مد میں وصول کیے گئے 30 روپے بھی واپس کرنے کا حکم دیا۔عدالت نے اپنے فیصلے میں قرار دیا کہ کمپنی کے لوگو والا شاپنگ بیگ صارف کو فراہم کرکے اس کی قیمت وصول کرنا غیر منصفانہ تجارتی عمل ہے۔
یہ بھی پڑھیں: پنجاب میں بارش نے رنگ جما دیا، تیز ہواؤں سے موسم خوشگوار
فیصلے کے مطابق شاپنگ بیگ پر برانڈ کا لوگو موجود ہونے کی وجہ سے یہ عمل کمپنی کی تشہیر کے زمرے میں آتا ہے، اس لیے تشہیری عمل کے اخراجات صارفین سے وصول کرنا قانون کے منافی ہے۔عدالت نے قرار دیا کہ صارف نے کپڑے خریدتے وقت اپنی خریداری کی قیمت ادا کی، اس کے علاوہ برانڈ کی تشہیر کے لیے استعمال ہونے والے شاپنگ بیگ کی قیمت صارف سے وصول نہیں کی جاسکتی۔کنزیومر کورٹ نے برانڈ کو خاتون کو مجموعی طور پر 25 ہزار روپے معاوضہ اور 30 روپے شاپنگ بیگ کی رقم واپس کرنے کا حکم دیتے ہوئے واضح کیا کہ صارفین سے ایسے اضافی اخراجات وصول کرنا قابلِ قبول نہیں۔
