اسلام آباد ( پاک ترک نیوز) پاکستان کو نئی نجی ایئرلائن مل گئی، ساؤتھ ایئر کو پروازوں کی باضابطہ اجازت مل گئی،ابتدائی طور پر ویٹ لیز طیاروں کے ذریعے اندرونِ ملک کمرشل پروازیں شروع کی جائیں گی۔ پاکستان سول ایوی ایشن اتھارٹی نے نئی نجی ایئرلائن ساؤتھ ایئر کو ایئر آپریٹر پرمٹ جاری کر دیا جس کے بعد ایئرلائن کو پاکستان میں کمرشل پروازیں شروع کرنے کی باضابطہ اجازت مل گئی ہے۔
پاکستان سول ایوی ایشن اتھارٹی کے مطابق اس پرمٹ کے تحت ساؤتھ ایئر ویٹ لیز پر حاصل کیے گئے طیاروں کے ذریعے اندرونِ ملک مسافر پروازیں چلانے کی مجاز ہوگی۔ توقع ہے کہ ایئرلائن آئندہ چند روز میں اپنی باقاعدہ فضائی سروس کا آغاز کر دے گی۔یہ اجازت نامہ سول ایوی ایشن اتھارٹی کے ڈائریکٹر جنرل نادر شفیع ڈار کے دستخط سے جاری کیا گیا۔
پی سی اے اے کا کہنا ہے کہ وزارتِ دفاع اور سول ایوی ایشن اتھارٹی نے مشترکہ طور پر ایئرلائن کے سرٹیفکیشن کا عمل مکمل کیا، جبکہ ادارہ پاکستان کے فضائی شعبے کی ترقی اور نئی ایئرلائنز کی حوصلہ افزائی کے لیے اپنا تعاون جاری رکھے گا۔
یہ بھی پڑھیں: باکمال لوگ۔ لاجواب سروس سےپی آئی اے کی نجکاری
ساؤتھ ایئر نے ملک کے مختلف ہوائی اڈوں تک پروازیں چلانے کا منصوبہ بنایا ہے۔ اس سلسلے میں ایئرلائن نیو گوادر انٹرنیشنل ایئرپورٹ اور سکھر ایئرپورٹ کے لیے آزمائشی پروازیں بھی مکمل کر چکی ہے، جن کے دوران پی سی اے اے کے انسپکٹرز نے آپریشنل جائزہ لیا۔
اس سے قبل مئی میں ساؤتھ ایئر نے کراچی سے گوادر کے درمیان اپنی پہلی آزمائشی پرواز کامیابی سے مکمل کی تھی، جسے بلوچستان کے فضائی رابطوں میں بہتری کی جانب ایک اہم پیش رفت قرار دیا گیا تھا۔
