اسلام آباد ( پاک ترک نیوز) مسلم لیگ (ن) کے رکنِ قومی اسمبلی ملک محمد اقبال چنڑ انتقال کر گئے۔اہلِ خانہ کے مطابق ملک محمد اقبال چنڑ گزشتہ کئی ہفتوں سے علیل تھے۔ انہیں برین ہیمرج ہوا تھا، جس کے بعد ان کا آپریشن بھی کیا گیا، تاہم وہ جانبر نہ ہو سکے۔
ملک محمد اقبال چنڑ قومی اسمبلی کے حلقہ این اے-168 بہاولپور سے منتخب رکن تھے اور مسلم لیگ (ن) کے سینئر رہنماؤں میں شمار ہوتے تھے۔
وزیراعظم شہباز شریف نے ملک محمد اقبال چنڑ کے انتقال پر گہرے دکھ اور افسوس کا اظہار کرتے ہوئے مرحوم کی سیاسی، سماجی اور عوامی خدمات کو خراجِ تحسین پیش کیا۔
وزیراعظم نے تعزیتی بیان میں کہا ملک اقبال چنڑ کی وفات سے ملک ایک مخلص عوامی رہنما سے محروم ہو گیا ہے۔ مرحوم مسلم لیگ (ن) کے نظریاتی کارکن اور نواز شریف کے وفادار ساتھی تھے۔
یہ بھی پڑھیں: 7فیصد پنشن اضافے کا باضابطہ نوٹیفکیشن،اطلاق یکم جولائی سے ہو گا
شہباز شریف نے کہا انہیں ذاتی طور پر ملک اقبال چنڑ کے ساتھ کام کرنے کا موقع ملا اور ان کی وفاداری، خدمات اور جماعت سے وابستگی کو ہمیشہ قدر کی نگاہ سے دیکھا جائے گا۔
وزیراعظم نے مرحوم کے درجات کی بلندی، اہلِ خانہ کے لیے صبرِ جمیل کی دعا کی اور کہا کہ قوم ان کی سیاسی اور عوامی خدمات کو ہمیشہ یاد رکھے گی۔
