تہران ( پاک ترک نیوز) ایران نے آبنائے ہرمز کھولے جانے سے متعلق امریکی دعوے کو مسترد کرتے ہوئے کہا ہے کہ آبنائے ہرمز پر مکمل کنٹرول ایران کے پاس ہے۔ ایرانی پاسداران انقلاب کی بحریہ نے امریکی مؤقف کو ناکامیوں پر پردہ ڈالنے کی کوشش قرار دیا ہے۔
پاسداران انقلاب کے مطابق آبنائے ہرمز سے متعلق امریکی بیانات زمینی حقائق کی عکاسی نہیں کرتے۔ ایرانی حکام کا کہنا ہے کہ امریکی کارروائیاں ختم ہونے تک آبنائے ہرمز پر عائد پابندیاں برقرار رہیں گی اور بحری آمدورفت ایران کی اجازت اور طے شدہ شرائط کے تحت ہی ممکن ہوگی۔
ایرانی مؤقف ایسے وقت سامنے آیا ہے جب امریکا کی جانب سے آبنائے ہرمز میں تجارتی بحری جہازوں کی آمدورفت بحال ہونے کے دعوے کیے جا رہے ہیں۔ امریکی حکام کا کہنا ہے کہ گزشتہ عرصے کے دوران متعدد تجارتی جہاز آبنائے سے گزر چکے ہیں، تاہم ایران اس راستے کو مکمل طور پر کھلا قرار دینے سے انکار کر رہا ہے۔
یہ بھی پڑھیں: فیلڈ مارشل سید عاصم منیر کا پاکستان آرڈیننس فیکٹریز واہ کا دورہ
اس سے قبل امریکی وزیر خزانہ اسکاٹ بیسینٹ نے دعویٰ کیا تھا کہ گزشتہ دو ہفتوں کے دوران تقریباً 130 ملین بیرل تیل آبنائے ہرمز سے منتقل کیا گیا۔ واشنگٹن کا مؤقف ہے کہ بحری راستے میں تیل کی ترسیل اور تجارتی سرگرمیاں جاری ہیں۔ تاہم ایران کا کہنا ہے کہ آبنائے کی صورتحال کو امریکی دعووں کے ذریعے مختلف انداز میں پیش کیا جا رہا ہے۔
