اسلام آباد ( پاک ترک نیوز) ترجمان دفتر خارجہ طاہر حسین اندرابی نے کہا ہے کہ خطے میں امن و استحکام کے لیے پاکستان کی سفارتی کوششیں جاری ہیں اور پاکستان مشرق وسطیٰ کے بحران کے حل کے لیے برادر ممالک سے مسلسل رابطے میں ہے۔
ہفتہ وار بریفنگ میں ترجمان دفتر خارجہ نے بتایا کہ فیلڈ مارشل نے ایران کا دورہ کیا، جہاں خطے میں کشیدگی کے خاتمے اور امن کے فروغ کے حوالے سے ایرانی حکام سے تفصیلی بات چیت ہوئی۔ترجمان نے واضح کیا کہ فیلڈ مارشل کا دورہ ایران صدر ڈونلڈ ٹرمپ یا امریکا کے نمائندے کی حیثیت سے نہیں تھا۔ یہ دورہ پاکستان کے ثالثی کردار اور خطے میں کشیدگی کم کرنے کی سفارتی کوششوں کے تناظر میں کیا گیا۔
یہ بھی پڑھیں: امریکا اور ایران میں نئی جنگ بندی پر اتفاق ،روسی میڈیا کا دعویٰ
ترجمان کے مطابق پاکستان نے واشنگٹن اور تہران کے درمیان مخلصانہ کردار ادا کیا، جسے ایرانی قیادت نے بھی سراہا۔ پاکستان آئندہ بھی ایران اور امریکا کے درمیان کشیدگی میں کمی کے لیے سفارتی کوششیں جاری رکھے گا۔ترجمان نے کہا کہ مکہ میں طے پانے والا مشترکہ دفاعی معاہدہ امن اور علاقائی استحکام کے فروغ کے لیے ایک دفاعی فریم ورک ہے۔ معاہدہ مشترکہ ذمہ داریوں اور سلامتی کے مفادات رکھنے والے ممالک کے لیے کھلا ہے، جبکہ کسی بھی ملک کی باضابطہ شمولیت کی درخواست پر شراکت دار ممالک سے مشاورت کی جائے گی۔
ترجمان دفتر خارجہ نے بتایا کہ وزیراعظم محمد شہباز شریف شنگھائی تعاون تنظیم کے سربراہی اجلاس میں شرکت کے لیے بشکیک کا دورہ کریں گے۔
