واشنگٹن(پاک ترک نیوز ) ٹرمپ انتظامیہ نے ایران پر اقتصادی دباؤ مزید بڑھاتے ہوئے متحدہ عرب امارات میں کام کرنے والے مصر کے بڑے بینک بنک مصر کی یو اے ای شاخوں کو امریکی مالیاتی نظام سے کاٹنے کا فیصلہ کیا ہے۔
امریکی محکمہ خزانہ کے مطابق اس اقدام کے تحت بینک کی یو اے ای شاخوں کو امریکی مالیاتی اداروں اور ڈالر پر مبنی لین دین تک رسائی سے محروم کرنے کی تجویز دی گئی ہے۔ یہ کارروائی ایران سے متعلق مبینہ مالی سرگرمیوں کے خلاف کی جا رہی ہے۔
امریکی حکام کے مطابق بینک کی یو اے ای شاخوں کے ذریعے تقریباً 1.8 ارب ڈالر کی ایسی لین دین ہوئی جس کا تعلق ایرانی شیڈو بینکنگ نیٹ ورک سے جوڑا گیا ہے۔
یہ بھی پڑھیں: امریکا اور ایران کے درمیان باضابطہ مذاکرات نہیں ہو رہے، وائٹ ہاؤس
تجویز کردہ اقدام 30 روزہ عوامی تبصرے کی مدت مکمل ہونے کے بعد نافذ ہو سکتا ہے۔ واشنگٹن کا کہنا ہے کہ ایران کو عالمی مالیاتی نظام تک رسائی دینے والے نیٹ ورکس کے خلاف کارروائی جاری رکھی جائے گی۔
امریکی کارروائی سے خلیجی ممالک میں کام کرنے والے بینکوں کے لیے ایران کے ساتھ مالی لین دین کے خطرات مزید بڑھ گئے ہیں، جبکہ تہران کی عالمی مالیاتی نظام تک رسائی محدود کرنے کی امریکی مہم میں شدت آ گئی ہے۔
