واہ کینٹ ( پاک ترک نیوز) آئی ایس پی آر کے مطابق فیلڈ مارشل سید عاصم منیر نے واہ میں پاکستان کے سب سے بڑے دفاعی صنعتی کمپلیکس پاکستان آرڈیننس فیکٹریز (پی او ایف) کا دورہ کیا۔فیلڈ مارشل سید عاصم منیر نے پی او ایف کی پیداواری صلاحیت، برآمدی استعداد اور ملکی دفاعی صنعتی بنیاد میں کردار کا جائزہ لیا۔ انہیں پی او ایف کی مختلف سرگرمیوں اور مقامی سطح پر تیار کیے جانے والے دفاعی سازوسامان کے حوالے سے تفصیلی بریفنگ دی گئی۔
آئی ایس پی آر کے مطابق فیلڈ مارشل سید عاصم منیر نے مقامی طور پر تیار کردہ اسلحے اور گولہ بارود کے تجربات اور آزمائشوں کا بھی مشاہدہ کیا۔انہیں ڈی آئی پی آر اے آرڈیننس کے نفاذ کے بعد پی او ایف کی کارپوریٹائزیشن میں ہونے والی پیش رفت سے بھی آگاہ کیا گیا۔ پی او ایف میں مقامی پیداوار اور استعدادِ کار بڑھانے کے لیے دو نئے صنعتی پلانٹس کی تنصیب جاری ہے، جن سے رواں سال کے اختتام تک پیداوار شروع ہونے کی توقع ہے۔
یہ بھی پڑھیں: لارڈز ٹیسٹ میں انگلینڈ کی گرفت مضبوط، پاکستان پر 261 رنز کی برتری
آئی ایس پی آر کے مطابق پی او ایف دفاعی پیداوار میں جدت، خود انحصاری اور ملکی صلاحیتوں میں اضافے کے لیے پرعزم ہے۔آئی ایس پی آر کا کہنا ہے کہ فیلڈ مارشل سید عاصم منیر کا پی او ایف کا دورہ دفاعی شعبے میں خود انحصاری، مقامی پیداوار اور تکنیکی جدت کے فروغ کے عزم کا عکاس ہے۔
