کراچی ( پاک ترک نیوز) وفاقی وزیر داخلہ محسن نقوی نے جناح انٹرنیشنل ایئرپورٹ کا دورہ کیا اور امیگریشن کاؤنٹرز پر مسافروں کے امیگریشن پراسیس کا جائزہ لیا۔
وزیر داخلہ نے بیرون ملک جانے والے مسافروں سے ملاقات کی اور ان سے امیگریشن کے عمل اور درپیش مشکلات کے بارے میں دریافت کیا۔دورے کے دوران امیگریشن سسٹم ڈاؤن ہونے کا معاملہ بھی سامنے آیا۔ محسن نقوی نے موقع پر ہی متعلقہ حکام سے ٹیلیفونک رابطہ کیا اور سسٹم کی خرابی فوری دور کرنے کی ہدایت کی۔
یہ بھی پڑھیں: ایران نے آبنائے ہرمز کھلنے سے متعلق امریکی دعویٰ مسترد کردیا
وزیر داخلہ نے کہا کہ سسٹم ڈاؤن ہونے کی صورت میں متبادل انتظام موجود ہونا چاہیے، امیگریشن پراسیس کسی صورت رکنا نہیں چاہیے۔محسن نقوی نے جعلی دستاویزات پر سفر کرنے والے افراد کے خلاف سخت ایکشن لینے کا حکم بھی دیا۔انہوں نے واضح کیا کہ نامکمل یا غیر تصدیق شدہ دستاویزات رکھنے والے کسی مسافر کو ہرگز سفر کی اجازت نہ دی جائے اور امیگریشن حکام مسافروں کی دستاویزات کی مکمل جانچ یقینی بنائیں۔
