سانحہ پمز کے بعد کراچی کے سب سے بڑے بچوں کے اسپتال میں بھی مبینہ حفاظتی غفلت سامنے آگئی

کراچی ( پاک تر ک نیوز) این آئی سی ایچ اسپتال کی نرسری میں 100 سے زائد نومولود بچوں کی موجودگی میں کھلے عام ویلڈنگ کی گئی۔فوٹیج میں ایک شخص کو نرسری کے اندر ویلڈنگ کرتے دیکھا جاسکتا ہے، جبکہ ویلڈنگ کے دوران نومولود بچے بھی اپنے بستروں پر موجود ہیں۔ذرائع کے مطابق نرسری میں 80 سے 120 بچے زیرِ علاج تھے اور ان میں زیادہ تر نومولود بچے آکسیجن پر تھے۔ماہرین کے مطابق آکسیجن سلنڈرز کی موجودگی میں ویلڈنگ کرنا انتہائی خطرناک ہے، ویلڈنگ کے دوران نکلنے والی ایک چنگاری بھی بڑے حادثے کا سبب بن سکتی تھی۔ماہرین کا کہنا ہے کہ ایئر کنڈیشنڈ نرسری میں ویلڈنگ کے باعث دھواں اور گھٹن پیدا ہوسکتی تھی، جبکہ آکسیجن پر موجود نومولود بچوں کیلئے یہ صورتحال جان لیوا ثابت ہوسکتی تھی۔

یہ بھی پڑھیں: پاکستان اور افغانستان میں پولیو وائرس موجود ہے ،وزیراعلیٰ سندھ

ذرائع کے مطابق مرمتی کام ایمرجنسی کی نرسری میں ہنگامی اخراج کا راستہ بنانے کیلئے کیا گیا، جبکہ سیمی کریٹیکل یونٹ میں آمدورفت کیلئے نیا راستہ بنانے کی غرض سے لوہے کی گرل بھی لگائی گئی ہے۔