کراچی (پاک ترک نیوز )ملک کے دیگر شہروں کی طرح کراچی میں بھی بعض شہریوں نے نئے صوبوں اور انتظامی یونٹس کے قیام کی حمایت کرتے ہوئے کہا ہے کہ بڑھتی ہوئی آبادی اور انتظامی مسائل کے پیش نظر نئے انتظامی ڈھانچے کی ضرورت ہے۔
کراچی کے شہریوں کا کہنا ہے کہ پورے پاکستان، بالخصوص سندھ میں نئے صوبے اور انتظامی یونٹس قائم کیے جانے چاہئیں تاکہ عوامی مسائل کے حل اور بنیادی سہولیات کی فراہمی کو بہتر بنایا جاسکے۔
شہریوں نے شکایت کی کہ ملک کے معاشی مرکز کراچی کے عوام کو پانی اور گیس جیسی بنیادی سہولیات کے حصول میں بھی مشکلات کا سامنا ہے، جبکہ شہر کی ٹوٹی سڑکیں اور کھلے گٹر حادثات کا سبب بن رہے ہیں۔
ان کا کہنا تھا کہ کراچی کی رونقیں بحال کرنے، ٹریفک کے مسائل پر قابو پانے اور شہری انتظامی امور بہتر بنانے کے لیے مؤثر نظام متعارف کرانا ضروری ہے۔
یہ بھی پڑھیں: کشمیر عوام نے فسادی جتھے کا پروپیگنڈا مسترد کر دیا
شہریوں نے موجودہ صوبائی حکومت پر تنقید کرتے ہوئے الزام عائد کیا کہ وہ کراچی کے دیرینہ مسائل حل کرنے میں ناکام رہی ہے۔ ان کے مطابق نئے انتظامی یونٹس کے قیام سے اختیارات اور وسائل کی بہتر تقسیم ممکن ہوسکتی ہے۔
