نئی دہلی ( پاک ترک نیوز ) روس نے مبینہ طور پر بھارت کو جدید ایس 500 پرومیتھیئس فضائی اور میزائل دفاعی نظام تک رسائی دینے کی پیشکش مزید پانچ ایس 400 اسکواڈرن کی خریداری سے مشروط کردی ہے۔
دفاعی ویب سائٹ ڈیفنس سکیورٹی ایشیا کے مطابق روسی پیشکش میں ٹیکنالوجی کی منتقلی اور مشترکہ یا مقامی سطح پر پیداوار کے امکانات بھی شامل ہیں۔ ممکنہ طور پر بھارت کو اس نظام کی دوبارہ برآمد کی اجازت دینے کی تجویز بھی زیرِ غور ہوسکتی ہے۔رپورٹ کے مطابق اس پیشکش کی اہمیت اس بات میں ہے کہ بھارت کو ایس 500 تک رسائی حاصل کرنے سے پہلے اپنے ایس 400 دفاعی نظام میں مزید توسیع کے لیے سرمایہ کاری کرنا ہوگی۔
تجزیے کے مطابق روس اس پیشکش کے ذریعے بھارت کو اپنے موجودہ دفاعی نظام کی مزید خریداری پر آمادہ کرنا چاہتا ہے، جس سے بھارتی فضائی اور میزائل دفاعی نظام میں روسی ٹیکنالوجی، تربیت اور تکنیکی معاونت پر انحصار مزید بڑھ سکتا ہے۔بھارت کے لیے جدید دفاعی صلاحیتوں تک رسائی ایک اہم موقع ہوسکتی ہے، تاہم اصل سوال یہ ہوگا کہ ٹیکنالوجی کی منتقلی سے اسے دفاعی نظام کی تیاری، دیکھ بھال اور آپریشن میں کتنی خودمختاری حاصل ہوتی ہے۔
