کراچی ( پاک ترک نیوز) وزیراعلیٰ سندھ سید مراد علی شاہ نے انسدادِ پولیو مہم کی افتتاحی تقریب کے موقع پر میڈیا سے گفتگو کرتے ہوئے کہا ہے کہ ان کی کوشش ہوتی ہے کہ وہ انسدادِ پولیو مہم کا خود افتتاح کریں۔مراد علی شاہ نے کہا کہ پاکستان اور افغانستان دو ایسے ممالک ہیں جہاں پولیو وائرس موجود ہے، سندھ حکومت اپنے شراکت داروں گیٹس، یونیسیف، روٹری اور دیگر اداروں کے تعاون سے انسدادِ پولیو مہم جاری رکھے ہوئے ہے۔
وزیراعلیٰ سندھ کے مطابق گزشتہ سال پاکستان میں پولیو کے 21 کیسز رپورٹ ہوئے تھے، جبکہ رواں سال اب تک 4 کیسز سامنے آئے ہیں۔ سندھ میں رواں سال فروری میں سجاول سے پولیو کا ایک کیس رپورٹ ہوا۔انہوں نے کہا کہ وزیر صحت ڈاکٹر عذرا پیچوہو کی سربراہی میں محکمہ صحت کی ٹیم نے انسدادِ پولیو کیلئے بھرپور محنت کی ہے، کوشش ہے کہ سندھ کے ماحول سے پولیو وائرس کا مکمل خاتمہ کیا جائے۔وزیراعلیٰ سندھ نے بتایا کہ موجودہ انسدادِ پولیو مہم 21 سے 27 ستمبر تک جاری رہے گی، جس کے دوران سندھ میں ایک کروڑ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
یہ بھی پڑھیں: سندھ کے 5 اضلاع کے ماحولیاتی نمونوں میں پولیو وائرس کی تصدیق
مراد علی شاہ نے والدین پر زور دیا کہ وہ اپنے پانچ سال سے کم عمر بچوں کو ہر مہم کے دوران پولیو سے بچاؤ کے قطرے ضرور پلوائیں تاکہ ملک سے اس موذی مرض کا مکمل خاتمہ ممکن بنایا جاسکے۔
