رحیم یار خان ( پاک ترک نیوز) رحیم یار خان مین شیخ زاید ایئرپورٹ تقریباً تین سال کی بندش کے بعد فضائی آپریشن دوبارہ بحال کر دیا گیا ، جس سے جنوبی پنجاب کے عوام کو ایک بار پھر فضائی سفر کی سہولت میسر آ گئی۔
نجی ایئرلائن ساؤتھ ایئر کی کراچی سے آنے والی افتتاحی پرواز کامیابی کے ساتھ شیخ زاید ایئرپورٹ پر اتری۔ پرواز میں 72 مسافر سوار تھے، جن کا ایئرپورٹ حکام نے پرتپاک استقبال کیا۔ اس موقع پر ایئرپورٹ پر خوشی کا ماحول دیکھنے میں آیا اور مسافروں کا خصوصی خیرمقدم کیا گیا۔
شیخ زاید ایئرپورٹ پر پروازوں کی بحالی سے رحیم یار خان اور گرد و نواح کے لاکھوں شہریوں کو سفری سہولت میسر آئے گی، جو گزشتہ تقریباً تین برس سے محدود فضائی آپشنز کے باعث مشکلات کا سامنا کر رہے تھے۔
یہ بھی پڑھیں: قطر ایئرویز کی 13بین الاقوامی پروازیں غیر معینہ مدت تک معطل
یہ پیش رفت پاکستان کی نئی نجی ایئرلائن ساؤتھ ایئر کے نیٹ ورک میں بھی ایک اہم اضافہ ہے، جو ملک کے ایسے شہروں میں اپنی پروازیں شروع کر رہی ہے جہاں فضائی رابطے محدود تھے۔
ماہرین کے مطابق شیخ زاید ایئرپورٹ پر کمرشل پروازوں کی بحالی سے نہ صرف علاقائی سفری سہولیات بہتر ہوں گی بلکہ جنوبی پنجاب میں تجارت، سرمایہ کاری اور معاشی سرگرمیوں کو بھی فروغ ملنے کی توقع ہے۔
