کراچی ( پاک ترک نیوز) قومی فضائی کمپنی پاکستان انٹرنیشنل ایئرلائنز نے مزید طیارے بیڑے میں شامل ہونے کے بعد مالدیپ کے لیے براہِ راست پروازیں شروع کرنے کا منصوبہ بنا لیا۔پی آئی اے کے مطابق مجوزہ فضائی رابطے سے پاکستان اور مالدیپ کے درمیان سیاحت، تجارت اور عوامی روابط کو فروغ ملے گا۔مالدیپ کے لیے پروازوں کے آغاز کا وقت نئے طیاروں کی دستیابی سے مشروط کردیا گیا ہے۔پی آئی اے کے چیف ایگزیکٹو افسر ایئر وائس مارشل محمد عامر حیات کا کہنا ہے کہ نئے طیارے بیڑے میں شامل ہونے کے بعد مالدیپ کے لیے فضائی سروس شروع کردی جائے گی۔
مالدیپ کے قومی اسمبلی کے اسپیکر عبدالرّحیم عبداللہ کی سربراہی میں مالدیپی وفد نے پی آئی اے کے مرکزی دفتر میں حکام سے ملاقات کی، جس میں براہِ راست پروازوں کی تجویز پر تبادلہ خیال کیا گیا۔مالدیپی اسپیکر نے کہا کہ براہِ راست پروازوں سے دونوں ممالک کے درمیان تجارت، سیاحت اور عوامی روابط میں اضافہ ہوگا جبکہ پاکستان اور مالدیپ کے تعلقات بھی مزید مضبوط ہوں گے۔دوسری جانب پی آئی اے اپنے فضائی بیڑے کو وسعت دینے اور جدید بنانے کے لیے بھی اقدامات کررہی ہے۔وزیر خزانہ محمد اورنگزیب اور بوئنگ کے عالمی صدر ڈاکٹر برینڈن نیلسن کے درمیان حالیہ ملاقات میں پی آئی اے کے لیے طیاروں کے حصول سے متعلق امور پر بات چیت ہوئی۔
یہ بھی پڑھیں: شاہ رخ خان کبھی ہمت نہیں ہارتے، امیتابھ بچن
مذاکرات میں طیاروں کی جلد فراہمی کے امکانات اور عبوری طور پر طیارے لیز پر حاصل کرنے کے طریقوں کا بھی جائزہ لیا گیا۔نئے طیاروں کی شمولیت کے بعد مالدیپ کے لیے براہِ راست پروازوں کا آغاز پاکستان اور مالدیپ کے درمیان فضائی رابطے میں اہم اضافہ ہوگا۔
