ابوظہبی ( پاک ترک نیوز) متحدہ عرب امارات نے دبئی سے اسرائیل جانے والی فلائی دبئی کی پرواز کی سعودی عرب میں ہنگامی لینڈنگ کے واقعے کو دہشت گردی قرار دے دیا ۔متحدہ عرب امارات کے پراسیکیوٹر جنرل حمد سیف الشمسی کے مطابق پرواز کے معاون پائلٹ نے کاک پٹ میں کپتان پر ہنگامی صورتِ حال میں استعمال ہونے والی کلہاڑی سے حملہ کیا اور طیارے کا کنٹرول سنبھالنے کی کوشش کی۔اماراتی حکام کے مطابق معاون پائلٹ نے مبینہ طور پر طیارے کو تباہ کرنے کی کوشش کی۔ واقعے کے بعد طیارے نے سعودی عرب کے تبوک ایئرپورٹ پر ہنگامی لینڈنگ کی۔
یہ بھی پڑھیں: لاہور ایک بار پھر دنیا کا آلودہ ترین بڑا شہر قرار
پراسیکیوٹر جنرل کے مطابق تحقیقات کا مقصد واقعے کے تمام حالات، محرکات اور ممکنہ روابط کا تعین کرنا ہے، جبکہ ٹھوس اور ڈیجیٹل شواہد کا بھی جائزہ لیا جا رہا ہے۔اماراتی حکام نے کہا ہے کہ تحقیقات مکمل ہونے کے بعد واقعے سے متعلق حتمی نتائج جاری کیے جائیں گے۔رپورٹس کے مطابق واقعے میں ملوث معاون پائلٹ کی شناخت عمانی شہری ہمام الحمامی کے طور پر ہوئی ہے۔ تاہم اس کے ممکنہ محرکات اور کسی تنظیم سے تعلق کے بارے میں تحقیقات جاری ہیں۔فلائی دبئی کی پرواز دبئی سے تل ابیب جارہی تھی جب دورانِ پرواز کاک پٹ میں واقعہ پیش آیا۔ سعودی حکام کے مطابق طیارہ بحفاظت تبوک ایئرپورٹ پر اتارا گیا اور مسافروں کو بعد میں متبادل پرواز کے ذریعے منزل کی جانب روانہ کیا گیا۔
