واشنگٹن (پاک ترک نیوز ) اسرائیلی وزیراعظم نیتن یاہو ایران پر نئے حملوں کے لیے مسلسل زور دے رہے ہیں، تاہم امریکی صدر ٹرمپ اور دیگر اعلیٰ حکام نے فی الحال رضامندی ظاہر نہیں کی۔
دو امریکی حکام اور ایک اسرائیلی سکیورٹی ذریعے کے مطابق اسرائیل نے گزشتہ پورے ہفتے امریکی حکام کو ایران کے خلاف فوری فوجی کارروائی پر آمادہ کرنے کی کوشش کی۔ امریکی انتظامیہ نے اسرائیل کو انتظار کرنے کا کہا، تاہم ذرائع نے مستقبل میں مشترکہ کارروائی پر رضامندی کا امکان ظاہر کیا۔
ذرائع کے مطابق امریکی ہچکچاہٹ کی ایک وجہ اسرائیلی فوج کے سربراہ سے منسوب یہ خدشہ بھی تھا کہ ایران پر نیا حملہ اسرائیل کے انتخابات ملتوی ہونے کا سبب بن سکتا ہے۔ اسرائیلی وزیراعظم کے دفتر نے اس دعوے کو جعلی خبر قرار دے کر مسترد کردیا۔
ذرائع کا کہنا ہے کہ اسرائیل نے امریکی مؤقف مجبوراً قبول کیا، کیونکہ اسے خدشہ ہے کہ حوثیوں کی جانب سے میزائل حملوں کی صورت میں اپنے دفاع کے لیے امریکی مدد درکار ہوگی۔
