ریاض ( پاک ترک نیوز) دبئی سے تل ابیب جانے والی فلائی دبئی کی پرواز میں دورانِ پرواز اچانک ہائی جیکنگ کا ہنگامی سگنل موصول ہونے کے بعد طیارے کا رخ سعودی عرب کی جانب موڑ دیا گیا، جہاں طیارے نے تبوک کے ہوائی اڈے پر بحفاظت لینڈنگ کی۔اسرائیلی میڈیا کے مطابق فلائی دبئی کی پرواز ایف زیڈ 1073 نے پہلے عمومی ہنگامی حالت کا کوڈ 7700 جاری کیا، جس کے کچھ دیر بعد 7500 کوڈ بھی منتقل کیا گیا۔ یہ کوڈ عموماً طیارے میں غیر قانونی مداخلت یا ممکنہ ہائی جیکنگ کی صورت میں استعمال ہوتا ہے۔
یہ بھی پڑھیں: پی آئی اے کا مالدیپ کے لیے براہِ راست پروازیں شروع کرنے کا منصوبہ
رپورٹس کے مطابق 7500 کوڈ موصول ہوتے ہی اسرائیلی فضائیہ نے احتیاطی طور پر دو جنگی طیارے روانہ کیے، جبکہ پرواز میں تقریباً 180 مسافر سوار تھے۔بعد ازاں فلائی دبئی کی پرواز نے دوبارہ 7700 ہنگامی کوڈ جاری کیا اور اپنا رخ تبدیل کرکے سعودی عرب کی جانب کرلیا۔ابتدائی اطلاعات کے مطابق ہنگامی صورتحال طیارے کے پائلٹس کے درمیان مبینہ جھگڑے کے باعث پیدا ہوئی۔ تاہم واقعے کی حتمی وجہ کی باضابطہ تصدیق تاحال نہیں ہوسکی۔اسرائیلی سکیورٹی ذرائع نے طیارے کے ہائی جیک ہونے کی اطلاعات مسترد کردی ہیں اور کہا ہے کہ پرواز کے ساتھ پیش آنے والے واقعے کا جائزہ لیا جا رہا ہے۔
