کراچی ( پاک ترک نیوز) کراچی کے نوجوان تاجر میر رضا کی موت کے معاملے کی تحقیقات میں اہم پیش رفت ہوئی ہے۔ میر رضا کی قبرکشائی کرکے میڈیکل بورڈ نے ان کے جسم سے ضروری نمونے حاصل کرلیے، جبکہ ڈی این اے ٹیسٹ کے لیے بھی نمونے محفوظ کرلیے گئے ہیں۔
قبرکشائی کے موقع پر میڈیکل بورڈ کے ارکان، میر رضا کے اہلخانہ اور ان کے وکیل جبران ناصر بھی موجود تھے۔ ڈاکٹرز کی ٹیم نے قانونی تقاضوں کے تحت لاش کا معائنہ کیا اور مختلف ضروری نمونے حاصل کیے۔ حاصل کیے گئے نمونے مزید فرانزک اور ڈی این اے جانچ کے لیے محفوظ کرلیے گئے ہیں۔
دوسری جانب میر رضا کے گھر سے روانگی سے چند گھنٹے قبل کی مبینہ آڈیو بھی سامنے آگئی ہے، جس نے معاملے کو مزید اہم بنا دیا ہے۔مبینہ آڈیو میں 30 لاکھ روپے طلب کیے جانے کا انکشاف ہوا ہے۔ ذرائع کے مطابق آڈیو میں رقم کی واپسی کے لیے تین چیکس دینے کی پیشکش بھی کی گئی، جبکہ میر رضا کی جانب سے مبینہ طور پر ایک ماہ کے اندر رقم واپس کرنے کی یقین دہانی کرائی گئی۔
یہ بھی پڑھیں: عبداللہ طاہر کیس میں اہم پیش رفت، ڈرائیور کو ہنی ٹریپ کرنے والی ٹک ٹاکر ملزمہ گرفتار
تحقیقاتی ادارے مبینہ آڈیو کی صداقت، اس میں موجود آوازوں اور گفتگو کے پس منظر کا جائزہ لے رہے ہیں۔ فرانزک رپورٹ اور میڈیکل بورڈ کی حتمی رپورٹ سامنے آنے کے بعد میر رضا کی موت کی اصل وجوہات کے تعین میں مزید مدد ملنے کی توقع ہے۔
