مظفر آباد ( پاک ترک نیوز) آزاد کشمیر قانون ساز اسمبلی کے انتخابات 2026 کے تیسرے مرحلے کی انتخابی مہم کا آج آخری روز ہے، جبکہ پونچھ ڈویژن کے ضلع باغ اور حویلی کہوٹہ میں چار حلقوں پر پولنگ 10 اگست کو ہوگی۔
تیسرے مرحلے میں پونچھ ڈویژن کے چار میں سے دو اضلاع کے چار حلقوں میں انتخابات ہوں گے۔ ضلع باغ اور حویلی کہوٹہ میں مجموعی طور پر 4 لاکھ 60 ہزار 371 ووٹرز اپنا حق رائے دہی استعمال کریں گے، جن میں 2 لاکھ 38 ہزار 664 مرد اور 2 لاکھ 21 ہزار 707 خواتین ووٹرز شامل ہیں۔دونوں اضلاع میں مجموعی طور پر 803 پولنگ اسٹیشنز قائم کیے گئے ہیں۔
ایل اے 14 باغ ون، دھیر کوٹ میں سابق وزیراعظم آزاد کشمیر سردار عتیق احمد خان کا مقابلہ سردار ساجد اقبال سے ہوگا، جبکہ مسلم لیگ ن کے راجہ فیصل آزاد اور پیپلز پارٹی کے راجہ مبشر اعجاز بھی میدان میں ہیں۔ حلقے میں ایک لاکھ 21 ہزار سے زائد ووٹرز کے لیے 214 پولنگ اسٹیشنز قائم کیے گئے ہیں۔
ایل اے 15 باغ ٹو میں مشتاق احمد منہاس، ضیاء القمر، ڈاکٹر محمد خان اور سردار تنویر الیاس کے درمیان مقابلہ ہوگا۔ حلقے میں ایک لاکھ 14 ہزار سے زائد ووٹرز کے لیے 213 پولنگ اسٹیشنز قائم کیے گئے ہیں۔
ایل اے 16 باغ تھری، شرقی میں مسلم لیگ ن کے سردار میر اکبر اور پیپلز پارٹی کے قمر الزمان کے درمیان کانٹے کا مقابلہ متوقع ہے۔ حلقے میں ایک لاکھ 6 ہزار سے زائد ووٹرز کے لیے 186 پولنگ اسٹیشنز قائم کیے گئے ہیں۔
ایل اے 17 باغ فور، حویلی میں پیپلز پارٹی کے فیصل ممتاز راٹھور کا مسلم لیگ ن کے چوہدری محسن عزیز اور خواجہ طارق سعید سے مقابلہ ہوگا۔ حلقے میں ایک لاکھ 17 ہزار سے زائد ووٹرز کے لیے 190 پولنگ اسٹیشنز قائم کیے گئے ہیں۔
دوسری جانب الیکشن کمیشن نے پونچھ ڈویژن کے دو اضلاع پر مشتمل سات حلقوں میں انتخابات ملتوی کر دیے ہیں۔
یہ بھی پڑھیں: عبداللہ طاہر کیس میں اہم پیش رفت، ڈرائیور کو ہنی ٹریپ کرنے والی ٹک ٹاکر ملزمہ گرفتار
انتخابی مہم کے آخری روز امیدواروں کی جانب سے ووٹرز کو اپنے حق میں متحرک کرنے کے لیے بھرپور سرگرمیاں جاری ہیں، جبکہ پولنگ کے لیے انتظامات کو بھی حتمی شکل دی جا رہی ہے۔
