لاہور(پاک ترک نیوز) عبداللہ طاہر کیس میں سی سی ڈی نے اہم پیش رفت کرتے ہوئے ڈرائیور اصغر کو مبینہ طور پر ہنی ٹریپ کرنے والی ٹک ٹاکر خاتون کو گرفتار کرلیا۔
سی سی ڈی ذرائع کے مطابق ملزمہ ماریہ کو گزشتہ رات سیالکوٹ سے گرفتار کیا گیا۔ ملزمہ کا تعلق فیصل آباد سے ہے اور وہ مبینہ واردات کے بعد سے فرار تھی۔
تفتیشی ذرائع کے مطابق عبداللہ طاہر کے ڈرائیور اصغر کے زیر استعمال ایک موبائل نمبر کا واٹس ایپ اکاؤنٹ ملزمہ ماریہ کے پاس تھا۔ ذرائع کا کہنا ہے کہ واردات کے بعد ملزمہ نے مبینہ طور پر واٹس ایپ اکاؤنٹ اور اپنا ٹک ٹاک اکاؤنٹ بھی حذف کردیا تھا۔
تفتیش کے دوران یہ بات بھی سامنے آئی ہے کہ ڈرائیور اصغر گزشتہ دو ماہ سے ماریہ نامی لڑکی سے رابطے میں تھا اور مبینہ واردات کے وقت بھی دونوں کے درمیان ویڈیو کال پر رابطہ جاری تھا۔
یہ بھی پڑھیں: ہنگو میں سکیورٹی فورسز کا انٹیلی جنس بیسڈ آپریشن، 7 خوارج ہلاک، کیپٹن حمزہ اکرم شہید
سی سی ڈی حکام ملزمہ سے مزید تفتیش کر رہے ہیں اور اس بات کا سراغ لگانے کی کوشش کی جا رہی ہے کہ ہنی ٹریپ کے لیے رابطہ کیسے قائم ہوا، واردات میں ملزمہ کا کردار کیا تھا اور اس معاملے میں مزید کون کون افراد ملوث ہیں۔
ملزمہ سے برآمد ہونے والے موبائل فون، ڈیجیٹل ریکارڈ، واٹس ایپ اور ٹک ٹاک اکاؤنٹس سمیت دیگر شواہد کا فرانزک جائزہ بھی لیا جائے گا۔
