میلبورن ( پاک ترک نیوز) انگلینڈ کلین سوئپ کی ہزیمت سے بچ گیا ، انگلش ٹیم 14برس بعد آسٹریلوی سرزمین پر فتح حاصل کرنے میں کامیاب ہوگئی ۔
تفصیلات کے مطابق انگلینڈ نے ٹیسٹ میچ میں 14 سال بعد آسٹریلوی سرزمین پر فتح حاصل کر لی، وائٹ واش ہونے سے بھی بچ گیا۔
میلبورن میں ایشز سیریز کے باکسنگ ڈے ٹیسٹ میں انگلینڈ نے آسٹریلیا کو 4 وکٹوں سے شکست دے دی ہے۔
ایشیز سیریز کے باکسنگ ڈے ٹیسٹ میچ میں آسٹریلیا نے انگلینڈ کو جیت کے لیے 175 رنز کا ہدف دیا تھا، انگلینڈ نے 175 رن کا ہدف 6 وکٹوں کے نقصان پر پورا کرلیا۔
دوسری اننگز میں آسٹریلیا کی ٹیم 132 رنز پر آؤٹ ہو گئی تھی، آسٹریلیا نے پہلی اننگز میں 152 رنز بنائے تھے، انگلینڈ پہلی اننگز میں 110 رنز پر آل آؤٹ ہو گئی تھی۔
دوسری اننگز میں انگلینڈ کی جانب سے جیکب بیتھل 40 رن بنا کر نمایاں رہے، انگلش فاسٹ بولر جوش ٹنگ نے میچ میں مجموعی طور پر 7 وکٹیں حاصل کیں، برائڈن کارس نے دوسری اننگز میں 4 آسٹریلوی بیٹرز کو آؤٹ کیا۔
آسٹریلیا کی جانب سے ٹریوس ہیڈ دوسری اننگز میں 46 رن کے ساتھ نمایاں رہے، واضح رہے کہ 5 میچز کی سیریز میں آسٹریلیا کو تین ایک سے فیصلہ کن برتری حاصل ہے۔
انگلینڈ کلین سوئپ کی ہزیمت سے بچ گیا،14برس بعد آسٹریلوی سرزمین پر فتح یاب
