برمنگھم ( پاک ترک نیوز) پاکستان کرکٹ ٹیم انگلینڈ کے خلاف تیسرے اور آخری ٹیسٹ میچ کے لیے برمنگھم پہنچ گئی ۔ قومی ٹیم کو سیریز کے پہلے دونوں ٹیسٹ میچز میں شکست کا سامنا کرنا پڑا، جس کے بعد انگلینڈ نے تین میچز کی سیریز میں 2-0 کی فیصلہ کن برتری حاصل کرلی ہے۔ پاکستان اور انگلینڈ کے درمیان تیسرا اور آخری ٹیسٹ 9 ستمبر سے برمنگھم کے ایجبسٹن کرکٹ گراؤنڈ میں شروع ہوگا۔ سیریز پہلے ہی انگلینڈ کے نام ہوچکی ہے، تاہم پاکستان کے پاس آخری ٹیسٹ جیت کر وائٹ واش سے بچنے اور دورۂ انگلینڈ کا اختتام کامیابی کے ساتھ کرنے کا موقع موجود ہے۔
یہ بھی پڑھیں: بابراعظم کی طبیعت ناساز،تیسرے ٹیسٹ میں شرکت پر سوالیہ نشان
قومی ٹیم کل ایجبسٹن کرکٹ گراؤنڈ میں ٹریننگ سیشن کرے گی، جہاں کھلاڑی تیسرے ٹیسٹ کی تیاریوں کو حتمی شکل دیں گے۔ نئے کھلاڑیوں کے لیے یہ سیشن خاص اہمیت رکھتا ہے کیونکہ انہیں انگلینڈ کے خلاف ٹیسٹ کرکٹ میں اپنی صلاحیتوں کے اظہار کا موقع مل سکتا ہے۔پاکستان کرکٹ بورڈ نے تیسرے ٹیسٹ سے قبل قومی اسکواڈ میں بڑے پیمانے پر تبدیلیاں کی ہیں۔ عبداللہ فضل اور عرافات منہاس سمیت نئے کھلاڑیوں کو اسکواڈ میں شامل کیا گیا ہے، جبکہ محمد عمران رندھاوا بھی ٹیم کا حصہ بن گئے ہیں۔ پی سی بی کے مطابق برمنگھم ٹیسٹ کے لیے پانچ کھلاڑیوں کو پہلی مرتبہ ٹیسٹ اسکواڈ میں شامل کیا گیا ہے۔
