لاہور( پاک ترک نیوز) 62لاکھ ڈالر کا کیلا ،آخر ایسا کیا تھا کہ ایک عام پھل کروڑں کا فن پارہ بن گیا؟ایک کیلا، دیوار پر ٹیپ سے چپکا ہوا… اور قیمت؟ 62 لاکھ 40 ہزار ڈالرجی ہاں، یہ کوئی مذاق نہیں بلکہ آرٹ کی دنیا کا ایسا واقعہ ہے جس نے پوری دنیا کو حیران کر دیا۔2019 میں میامی کے ایک بڑے آرٹ میلے میں اطالوی فنکار موریتسیو کاتیلان نے ایک عجیب و غریب فن پارہ پیش کیا۔
دیوار پر صرف ایک عام سا کیلا ٹیپ سے چپکایا گیا تھا۔اس فن پارے کا نام تھا "کامیڈین”۔لوگ اسے دیکھ کر حیران بھی ہوئے، ہنسے بھی اور اس کا مذاق بھی اڑایا۔لیکن اصل دھماکا اس وقت ہوا جب معلوم ہوا کہ اس کیلے کی قیمت ایک لاکھ 20 ہزار ڈالر مقرر کی گئی ہے۔بعد میں ایک اور ایڈیشن ڈیڑھ لاکھ ڈالر میں فروخت ہوا۔خریدار کو کیا ملا؟نہ کوئی قیمتی پتھر، نہ سونا، نہ کوئی نایاب مجسمہ!اسے ملا ایک سرٹیفکیٹ اور کیلا دیوار پر لگانے کی ہدایات!یہاں تک کہ ہدایات میں یہ بھی بتایا گیا کہ کیلا وقتاً فوقتاً تبدیل کیا جا سکتا ہے۔لیکن کہانی یہاں ختم نہیں ہوئی۔
یہ بھی پڑھیں: اسٹار ٹریک کی 60ویں سالگرہ، خلا باز نے خلائی اسٹیشن پر یادگاری نشان لہرایا
معروف برطانوی نشریاتی ادارے کی رپورٹ کے مطابق یہ کیلا سوشل میڈیا پر ایسا وائرل ہوا کہ دنیا بھر میں اس پر بحث شروع ہوگئی۔کسی نے اسے فن کہا، کسی نے مذاق قرار دیا، جبکہ کچھ لوگوں نے سوال اٹھایا کہ آخر ایک عام کیلے پر اتنی رقم کیوں خرچ کی جائے؟پھر آیا سال 2024۔اسی فن پارے کے ایک ایڈیشن کی نیلامی ہوئی اور قیمت جا پہنچی 62 لاکھ 40 ہزار ڈالر تک۔یعنی پاکستانی کرنسی میں تقریباً ایک ارب 66 کروڑ روپے!لیکن سوال یہ ہے کہ خریدار نے آخر خریدا کیا؟اصل میں اس نے صرف کیلا نہیں خریدا تھا۔اس نے اس فن پارے کی تصوری اہمیت، فنکار کا تصور اور اس کی ملکیت کا سرٹیفکیٹ خریدا تھا۔
اور شاید یہی اس پورے معاملے کا سب سے بڑا راز ہے۔کاتیلان نے ایک عام کیلے کو ایسی چیز بنا دیا جس پر دنیا بھر کے میڈیا نے بحث کی۔لوگوں نے جتنا مذاق اڑایا، اتنی ہی توجہ ملی۔جتنی توجہ ملی، اتنی ہی شہرت بڑھی۔اور شہرت نے اس فن پارے کی قیمت بھی بڑھا دی۔
