اسلام آباد ( پاک ترک نیوز) یومِ دفاع و شہداء کے موقع پر ملک بھر میں نشانِ حیدر پانے والے قومی ہیروز کے مزارات پر دعائیہ تقریبات کا انعقاد کیا گیا۔گجرات میں میجر راجہ عزیز بھٹی شہید نشانِ حیدر کے مزار پر دعائیہ تقریب ہوئی، جہاں مہمانِ خصوصی میجر جنرل اظہر یاسین نے شہید کے مزار پر پھول رکھے اور فاتحہ خوانی کی۔
جہلم میں میجر محمد اکرم شہید نشانِ حیدر کے مزار پر دعائیہ تقریب منعقد ہوئی، میجر جنرل سردار محمد طارق خان نے مزار پر پھول رکھے اور شہید کو خراجِ عقیدت پیش کیا۔گوجر خان میں کیپٹن سرور شہید نشانِ حیدر کے مزار پر بھی حاضری دی گئی اور پھول رکھے گئے۔صوابی میں کیپٹن کرنل شیر خان شہید کے مزار پر دعائیہ تقریب ہوئی، جہاں میجر جنرل راؤ عمران سرتاج نے پھول رکھے اور فاتحہ خوانی کی۔
لانس نائیک محمد محفوظ شہید نشانِ حیدر اور سوار محمد حسین شہید نشانِ حیدر کے مزارات پر بھی دعائیہ تقریبات منعقد کی گئیں۔تقریبات میں شہداء کے درجات کی بلندی، ملک و قوم کی سلامتی اور پاکستان کے دفاع کے لیے خصوصی دعائیں کی گئیں، جبکہ شہداء کی عظیم قربانیوں کو خراجِ عقیدت پیش کیا گیا۔
یہ بھی پڑھیں: مون سون بارشوں کا نیا اسپیل، کئی شہروں میں موسم خوشگوار
دوسری جانب کراچی میں مزارِ قائد پر گارڈز کی تبدیلی کی پروقار تقریب منعقد ہوئی، جہاں پاکستان ایئرفورس کے کیڈٹس نے گارڈز کے فرائض سنبھال لیے۔پاک فضائیہ کے چاق و چوبند دستے نے مزارِ قائد پر شاندار پریڈ پیش کی۔ دستے میں 64 مرد اور 8 خواتین کیڈٹس شامل تھیں۔تقریب کے مہمانِ خصوصی ایئر آفیسر کمانڈنگ پاکستان ایئر فورس اکیڈمی اصغر خان، ایئر وائس مارشل حسن فیصل تھے۔ انہوں نے مزارِ قائد پر پھول رکھے اور فاتحہ خوانی کی، جبکہ مہمانوں کی کتاب میں اپنے تاثرات بھی قلمبند کیے۔
تینوں مسلح افواج کے نمائندوں نے بھی بانیِ پاکستان قائداعظم محمد علی جناح کے مزار پر حاضری دی، پھولوں کی چادریں چڑھائیں اور فاتحہ خوانی کی۔تقریب سے خطاب کرتے ہوئے ایئر وائس مارشل حسن فیصل نے کہا کہ پاکستان کی فضائی حدود کا دفاع پاک فضائیہ کے مضبوط ہاتھوں میں ہے۔انہوں نے کہا کہ پاک فضائیہ نے گزشتہ سال بھارتی جارحیت کا منہ توڑ جواب دیا، پاک فضائیہ قوم کی امیدوں پر ہمیشہ پوری اتری ہے اور مشکل کی ہر گھڑی میں اپنی خدمات پیش کی ہیں۔ایئر وائس مارشل حسن فیصل کا کہنا تھا کہ پاک فضائیہ ملکی دفاع اور فضائی حدود کی حفاظت کے لیے پوری طرح تیار ہے۔
