کراچی (پاک ترک نیوز )نیشنل بینک آف پاکستان کے صدر اور چیف ایگزیکٹو آفیسر عمران سرور کی ماہانہ تنخواہ 95 لاکھ روپے مقرر کر دی گئی ہے، جبکہ انہیں 3 کروڑ روپے کی لائف انشورنس، دو گاڑیاں، گھر کے کرائے کی مد میں 10 لاکھ روپے ماہانہ اور دیگر مراعات بھی حاصل ہوں گی۔
پاکستان اسٹاک ایکسچینج میں جمع کرائی گئی ریگولیٹری دستاویز کے مطابق نیشنل بینک کے شیئر ہولڈرز نے عمران سرور کے معاوضے اور مراعات کے پیکیج کی منظوری دے دی ہے۔ یہ پیکیج 9 ستمبر 2026 سے 2029 تک کے معاہدے کے لیے منظور کیا گیا ہے اور تنخواہ پر قابلِ اطلاق ٹیکس بھی عائد ہوں گے۔
منظور شدہ پیکیج کے تحت عمران سرور کو ماہانہ 95 لاکھ روپے مجموعی تنخواہ کے علاوہ ایک کروڑ روپے نہیں بلکہ سالانہ کارکردگی کی بنیاد پر اضافی بونس بھی مل سکتا ہے۔ اس کے علاوہ رعایتی ہاؤس لون کے بجائے ماہانہ 10 لاکھ روپے ہاؤس رینٹ الاؤنس دیا جائے گا۔
مراعات میں بجلی، گیس اور دیگر یوٹیلیٹی اخراجات، دو رہائشی ٹیلی فون، دو موبائل فون اور ان کے اصل بلوں کی ادائیگی شامل ہے۔ ان کی رہائش گاہ پر چار سکیورٹی گارڈز 12، 12 گھنٹے کی شفٹوں میں تعینات ہوں گے، جبکہ پانچ گھریلو ملازمین کے اخراجات کی مد میں ماہانہ ڈیڑھ لاکھ روپے ادا کیے جائیں گے۔
بینک کے صدر کو 3500 سی سی تک کی ایک گاڑی اور بینک کے دستیاب پول سے دوسری گاڑی فراہم کی جائے گی۔ معاہدہ مکمل ہونے پر وہ اپنی مخصوص گاڑی کی قیمت یا اس کی تحریری طور پر درج شدہ گھٹی ہوئی مالیت، دونوں میں سے جو زیادہ ہو، اس کے 10 فیصد پر گاڑی خریدنے کے حق دار ہوں گے۔ انہیں دو ڈرائیور بھی فراہم کیے جائیں گے یا متبادل طور پر ہر ڈرائیور کے لیے ماہانہ 45 ہزار روپے ادا کیے جائیں گے۔
دیگر مراعات میں سالانہ 30 دن کی چھٹیاں، 18 دن کی بیماری کی چھٹیاں اور زیادہ سے زیادہ 90 دن کی سالانہ چھٹیاں جمع کرنے کی سہولت شامل ہے۔ جمع شدہ سالانہ چھٹیاں آخری مجموعی تنخواہ کی بنیاد پر نقد بھی کروائی جا سکیں گی۔
عمران سرور کو رہائش گاہ پر 15 لاکھ روپے تک کی لاگت کا جنریٹر فراہم کیا جائے گا، جبکہ پاکستان میں ان کے اور ان کے زیرِ کفالت اہل خانہ کے طبی اور دانتوں کے علاج کے اخراجات بھی ادا کیے جائیں گے۔ لائف انشورنس کی کوریج 3 کروڑ روپے ہوگی، جس کے سالانہ پریمیم کا 50 فیصد بینک اور باقی 50 فیصد صدر و چیف ایگزیکٹو ادا کریں گے۔
اس کے علاوہ ہر سال کی ملازمت کے بدلے آخری مجموعی ماہانہ تنخواہ کے برابر گریجویٹی اور دو کلبوں کی انٹری فیس سمیت تین کلبوں کی رکنیت کے اخراجات بھی بینک ادا کرے گا۔
