انقرہ ( پاک ترک نیوز) ترکیہ کی دفاعی ٹیکنالوجی کمپنی اسیل سان نے تقریباً دو ہفتوں کے دوران 6 ارب 15 کروڑ ڈالر مالیت کے معاہدے حاصل کر لیے، جن میں جدید فضائی دفاعی نظام، ریڈار اور دفاعی سازوسامان کی تیاری اور برآمدات شامل ہیں۔ترک دفاعی صنعت میں اہم مقام رکھنے والی کمپنی اسیل سان نے 23 ستمبر سے 7 اکتوبر تک مقامی اور بین الاقوامی منڈیوں میں متعدد بڑے معاہدوں پر دستخط کیے۔ ان معاہدوں میں ترکیہ کے کثیر سطحی فضائی دفاعی نظام ’’اسٹیل ڈوم‘‘ کو مزید مضبوط بنانے کے منصوبے بھی شامل ہیں۔
کمپنی کے مطابق، 7 اکتوبر کو ترکیہ کے دفاعی صنعتوں کے ادارے کے ساتھ 19 کروڑ 50 لاکھ ڈالر کا معاہدہ کیا گیا، جس کے تحت ریڈار نظام فراہم کیے جائیں گے۔اس سے ایک روز قبل 6 اکتوبر کو بیرونِ ملک خریداروں کے ساتھ الیکٹرانک جنگی نظام، برقی و بصری آلات، ہدف کا سراغ لگانے والے نظام، نگرانی، مواصلات اور ہتھیاروں کی برآمد کے معاہدوں کا اعلان کیا گیا۔5 اکتوبر کو کمپنی نے ترکیہ کے دفاعی صنعتوں کے ادارے کے ساتھ 2 ارب 46 کروڑ یورو کا معاہدہ کیا، جس کے تحت مشترکہ صلاحیتوں پر مبنی فضائی دفاعی نظام فراہم کیے جائیں گے۔اسی طرح 2 اکتوبر کو ایک غیر ملکی خریدار کے ساتھ فضائی دفاعی نظام کی برآمد کے لیے 48 کروڑ 85 لاکھ یورو کا معاہدہ کیا گیا، جبکہ یکم اکتوبر کو طویل فاصلے تک مار کرنے والے فضائی دفاعی نظام کی بڑے پیمانے پر تیاری کے لیے ایک ارب یورو سے زائد مالیت کے مزید معاہدے کیے گئے۔
یہ بھی پڑھیں: سابق دور میں مارچ کو فکسڈ میچ قرار دینے پر علی امین گنڈا پور برہم
23 ستمبر کو اسیل سان نے ترک دفاعی کمپنی روکیت سان کے ساتھ بھی فضائی دفاعی نظام کے ذیلی پرزے فراہم کرنے کے لیے ایک ارب 23 کروڑ یورو کا معاہدہ کیا تھا۔اسیل سان ترکیہ کے اسٹیل ڈوم منصوبے کی اہم شراکت دار کمپنیوں میں شامل ہے۔ اس نظام کا مقصد مختلف ریڈاروں، نگرانی کے آلات، کمانڈ اینڈ کنٹرول نظام اور ہتھیاروں کو ایک مربوط دفاعی نیٹ ورک میں یکجا کرنا ہے، تاکہ فضائی خطرات کا سراغ لگا کر ان کا مقابلہ کیا جا سکے۔
