ماسکو ( پاک ترک نیوز) روس کے فضائی اڈوں پر کیا ہو رہا ہے؟ کیا یوکرین پر ایک اور تباہ کن حملے کی الٹی گنتی شروع ہو چکی ہے؟سیٹلائٹ تصاویر میں روس کے طاقتور اسٹریٹجک بمبار طیارے میزائلوں سے لیس ہوتے دکھائی دے رہے ہیں۔۔۔ دوسری جانب ایک فوجی اڈے پر درجنوں بمبار طیاروں کی موجودگی نے نئے سوالات کھڑے کر دیے ہیں کیا روس ایک بار پھر آسمان سے آگ برسانے کی تیاری کر رہا ہے؟ آئیے جانتے ہیں
روس کے اینگلز فضائی اڈے سے سامنے آنے والی نئی سیٹلائٹ تصاویر نے فوجی سرگرمیوں کی اہم تفصیلات ظاہر کر دی ہیں۔ نگرانی کی ویب سائٹ ایوی ویکٹر کے مطابق تصاویر میں روس کے ٹی یو 160 ایم اسٹریٹجک بمبار طیاروں کو کے ایچ 101 کروز میزائلوں سے لیس کرتے دیکھا جا سکتا ہے۔یہ محض طیاروں کی موجودگی نہیں۔۔۔ بلکہ ان کی تیاری، میزائلوں کی تنصیب اور فوجی سرگرمیوں کی ترتیب بھی اہم سوالات اٹھا رہی ہے۔تجزیے کے مطابق بمبار طیاروں کی ایک اڈے سے دوسرے اڈے تک نقل و حرکت اور تکنیکی تیاریوں میں لگنے والا وقت، یوکرین پر بڑے فضائی حملوں کے درمیان وقفے پر اثر انداز ہو سکتا ہے۔
اب ذرا روس کے اولینیا فضائی اڈے پر نظر ڈالیے۔۔۔ جہاں نو اکتوبر 2026 کی سیٹلائٹ تصاویر کے تجزیے کے مطابق سات ٹی یو 95 ایم ایس اسٹریٹجک بمبار طیارے اور زیادہ سے زیادہ 33 ٹی یو 22 ایم 3 بمبار موجود تھے۔چھ ٹی یو 95 ایم ایس طیارے روس کے مشرق بعید میں واقع یوکرینکا اڈے پر واپس پہنچے، جبکہ ایک ٹی یو 22 ایم 3 طیارے کو اینگلز منتقل کیا گیا۔یہ اعداد و شمار روس کے مختلف فضائی اڈوں پر بمبار طیاروں کی نقل و حرکت اور تعیناتی کی تصویر پیش کرتے ہیں۔۔۔ لیکن کیا یہ کسی بڑے حملے سے پہلے کی تیاریاں ہیں؟
یہ بھی پڑھیں: چین کے ایچ 6 کے بمبار طیارے سے ہائپرسونک میزائل داغنے کی پہلی ویڈیو جاری، امریکی بحری بیڑوں کے لیے بڑا خطرہ
اینگلز فضائی اڈے پر بمبار طیاروں کے لیے حفاظتی ہینگرز کی تعمیر بھی جاری ہے۔ تعمیر کا آغاز تقریباً ایک سال پہلے ہوا، تاہم اب تک تین ہینگرز کے ڈھانچے تیار کیے جانے کی اطلاع ہے۔دوسری جانب تجزیے میں امکان ظاہر کیا گیا ہے کہ روس اپنے بعض بمبار طیاروں کو یوکرین کے قریب واقع فضائی اڈوں پر تعینات رکھنا چاہتا ہے، جبکہ دوسرے طیاروں کو مشرق بعید میں محفوظ مقامات پر رکھا جا رہا ہے۔ اب سوال یہ ہے۔۔۔ کیا روس ایک نئی فضائی کارروائی کی تیاری کر رہا ہے، یا یہ اس کی معمول کی فوجی سرگرمیوں کا حصہ ہے؟ آنے والے دن اس حوالے سے اہم ہو سکتے ہیں!
