استنبول (پاک ترک نیوز ) نائب وزیراعظم اور وزیر خارجہ اسحاق ڈار نے استنبول میں مصر اور جرمنی کے وزرائے خارجہ سے الگ الگ ملاقاتیں کیں، جن میں دوطرفہ تعلقات کے فروغ، تجارتی تعاون اور علاقائی و عالمی صورتِ حال پر تبادلہ خیال کیا گیا۔
ترجمان دفتر خارجہ کے مطابق اسحاق ڈار کی مصر کے وزیر خارجہ ڈاکٹر بدر عبدالعاطی سے ملاقات ریجنل فور کے وزارتی اجلاس کے موقع پر ہوئی۔ دونوں رہنماؤں نے پاکستان اور مصر کے دیرینہ برادرانہ تعلقات کی توثیق کرتے ہوئے دوطرفہ روابط مزید مضبوط بنانے کی اہمیت پر زور دیا۔
ملاقات میں تجارت، کاروباری روابط، زراعت اور ادویہ سازی سمیت مختلف شعبوں میں تعاون تیز کرنے پر اتفاق کیا گیا۔ دونوں وزرائے خارجہ نے رابطہ کاری، قابلِ تجدید توانائی، دفاع اور عوامی سطح پر تبادلوں کے فروغ پر بھی تبادلہ خیال کیا۔
ملاقات کے دوران فلسطین اور مشرقِ وسطیٰ کی صورتِ حال کا جائزہ لیا گیا، جبکہ علاقائی چیلنجز سے نمٹنے کے لیے مسلسل مکالمے اور سفارت کاری کی اہمیت پر زور دیا گیا۔ دونوں رہنماؤں نے ریجنل فور کے تحت مسلسل مشاورت اور قریبی روابط برقرار رکھنے کے عزم کا اظہار کیا۔
دوسری جانب نائب وزیراعظم اسحاق ڈار نے جرمن وزیر خارجہ یوہان واڈے فول سے بھی ملاقات کی۔ ترجمان دفتر خارجہ کے مطابق یہ ملاقات آر فور اور ای فور کے وزارتی اجلاسوں کے موقع پر ہوئی، جس میں پاک جرمن دوطرفہ تعلقات اور باہمی دلچسپی کے امور زیرِ بحث آئے۔
اسحاق ڈار نے مسلسل رابطوں اور مختلف شعبوں میں تعاون کے ذریعے پاکستان اور جرمنی کے تعلقات مزید مضبوط بنانے کی خواہش کا اظہار کیا۔ دونوں رہنماؤں نے علاقائی اور عالمی سطح پر ہونے والی تازہ پیش رفت پر بھی تبادلہ خیال کیا۔
ملاقات میں علاقائی چیلنجز سے نمٹنے اور امن و استحکام کے فروغ کے لیے مذاکرات، سفارت کاری اور عالمی سطح پر مسلسل رابطوں کی اہمیت پر زور دیا گیا۔
نائب وزیراعظم اسحاق ڈار نے آر فور کے فریم ورک کے تحت جرمنی، فرانس، اٹلی اور برطانیہ کے تعمیری روابط کا خیرمقدم کرتے ہوئے باہمی تشویش کے امور پر مسلسل مشاورت اور سفارتی رابطہ کاری کی اہمیت اجاگر کی۔
