لاہور( پاک ترک نیوز) وزیراعلیٰ پنجاب مریم نواز شریف نے پنجاب میں جاری سڑکوں کے ترقیاتی منصوبوں پر کام تیز کرنے کی ہدایت دیتے ہوئے پنجاب رنگ روڈ اتھارٹی کے تحت 6 نئے سروس ایریاز کے قیام کی منظوری دے دی۔
وزیراعلیٰ کی زیرِ صدارت اجلاس میں بتایا گیا کہ چیف منسٹر انیشی ایٹو، لوکل روڈز پروگرام اور تکمیل کے قریب منصوبوں کے لیے 125 ارب روپے مختص کیے گئے ہیں، جبکہ سڑکوں کے شعبے کے لیے مختص ترقیاتی فنڈز کا 99 فیصد استعمال کیا جا چکا ہے۔
اجلاس کو بریفنگ میں بتایا گیا کہ لوکل روڈز پروگرام کے تحت 79 ارب روپے مالیت کی 1,567 ترقیاتی اسکیمیں شامل ہیں، جن کے ذریعے 3,400 کلومیٹر سڑکوں کی تعمیر و بحالی کا کام کیا جا رہا ہے۔ ان میں سے 1,129 منصوبے صرف 75 دن میں مکمل کیے جا چکے ہیں۔
حکام کے مطابق سڑکوں کی بحالی کے منصوبوں میں بہتر انتظام کے باعث 11 ارب روپے کی بچت بھی کی گئی۔
یہ بھی پڑھیں: پنجاب حکومت کا اثاثوں کا حساب رکھنے کیلئے ایسٹ مینجمنٹ اتھارٹی قائم کرنے کا فیصلہ
اجلاس میں بتایا گیا کہ 93.5 کلومیٹر طویل ملتان وہاڑی ڈوئل کیرج وے، 24 کلومیٹر فیصل آبادچنیوٹ ڈوئل کیرج وے اور 13 کلومیٹر طویل ٹورازم ہائی وے مکمل کر لیے گئے ہیں۔
بریفنگ کے مطابق سیلاب سے متاثرہ 124 سڑکوں کی بحالی کا کام بھی مکمل ہو چکا ہے۔اجلاس کے دوران وزیراعلیٰ نے پنجاب رنگ روڈ اتھارٹی کے تحت 6 جدید سروس ایریاز قائم کرنے کی منظوری دی۔ حکام کے مطابق ان سروس ایریاز سے حکومت کو سالانہ تقریباً 50 کروڑ روپے آمدن متوقع ہے۔
