راولپنڈی(پاک ترک نیوز )47 ارب روپے کی لاگت سے تعمیر ہونے والا راولپنڈی رنگ روڈ منصوبہ تکمیل کے آخری مرحلے میں داخل ہو گیا ۔آئندہ جولائی کے پہلے ہفتے میں اس کی تعمیر مکمل ہونے کے بعد اسے ٹریفک کے لیے کھولنے کی تیاری کی جا رہی ہے۔
ڈپٹی پراجیکٹ ڈائریکٹر اشفاق سلہری کے مطابق 38 کلومیٹر طویل رنگ روڈ پر اسفالٹ بچھانے کا کام مکمل ہو چکا ہے، جبکہ باقی ماندہ معمولی کام تیزی سے جاری ہیں۔ منصوبہ مکمل ہونے کی رپورٹ جولائی کے پہلے ہفتے میں پنجاب حکومت کو ارسال کی جائے گی، جس کے بعد افتتاحی تقریب کی تاریخ کا اعلان کیا جائے گا۔
انہوں نے بتایا کہ اس وقت سڑک کے اطراف شجرکاری، سائن بورڈز کی تنصیب، اسٹریٹ لائٹس، فینسنگ، لین مارکنگ اور نکاسی آب کے نظام پر کام جاری ہے۔ بلند ڈھلوانوں پر خصوصی گھاس بھی لگائی جا رہی ہے تاکہ مٹی کے کٹاؤ کو روکا جا سکے۔
اشفاق سلہری کے مطابق تھلیاں انٹرچینج پر تعمیراتی کام رنگ روڈ مکمل ہونے کے بعد شروع ہوگا، جس میں تقریباً تین ماہ لگیں گے۔ اس منصوبے کے تحت چار رویہ انٹرچینج تعمیر کیا جائے گا جبکہ اسلام آباد انٹرنیشنل ایئرپورٹ جانے والے موٹروے پل کو بھی توسیع دی جائے گی۔
حکام کے مطابق رنگ روڈ پر روزانہ 30 ہزار سے زائد گاڑیوں کی آمدورفت متوقع ہے، جبکہ سڑک پر زیادہ سے زیادہ رفتار 120 کلومیٹر فی گھنٹہ مقرر کی جائے گی۔ اس کے علاوہ لاہور رنگ روڈ کی طرز پر ٹول پلازہ سسٹم بھی متعارف کرایا جائے گا۔
یہ بھی پڑھیں: "اوئے سامان اٹھاؤ، نکلو” پیرا فورس میں اب مغرور کلچر نہیں چلے گا
منصوبہ مکمل ہونے کے بعد جی ٹی روڈ سے موٹروے چوک تک عام ٹریفک کا تقریباً 25 سے 30 فیصد جبکہ 70 فیصد مال بردار ٹریفک رنگ روڈ استعمال کرے گی، جس سے راولپنڈی اور اسلام آباد کی سڑکوں پر ٹریفک کا دباؤ نمایاں طور پر کم ہونے کی توقع ہے۔
38.3 کلومیٹر طویل رنگ روڈ بانٹھ (جی ٹی روڈ) سے تھلیاں (موٹروے) تک تعمیر کی گئی ہے، جس میں بانٹھ، میرا موہڑہ، خاصالہ، کولیاں پر اور تھلیاں کے مقام پر پانچ انٹرچینجز قائم کیے گئے ہیں۔ منصوبے کے اطراف ایک صنعتی زون بھی قائم کیا جائے گا۔
