اسلام آباد(پاک ترک نیوز ) پاکستان کی نجی فضائی کمپنی ایئر انڈس نے 11 سال سے زائد عرصے بعد دوبارہ پروازیں شروع کرنے کا اعلان کر دیا۔ کمپنی پہلے ملک کے اندر فضائی آپریشن بحال کرے گی، جس کے بعد خلیجی ممالک کے لیے بین الاقوامی پروازوں کا آغاز کیا جائے گا۔
ایئر انڈس کی ویب سائٹ پر جاری معلومات کے مطابق فضائی کمپنی جدید طیاروں پر مشتمل اپنے بیڑے کے ساتھ آپریشن دوبارہ شروع کرنے کی تیاریوں کو حتمی شکل دے رہی ہے۔
کمپنی کے مطابق پہلے مرحلے میں کراچی کو مرکزی مرکز بنا کر اندرونِ ملک پروازیں شروع کی جائیں گی۔ ابتدائی منصوبے کے تحت کراچی اور اسلام آباد کے درمیان روزانہ تین جبکہ کراچی اور لاہور کے درمیان روزانہ دو پروازیں چلائی جائیں گی۔
کراچی سے پشاور، سیالکوٹ، کوئٹہ، گوادر، فیصل آباد، ملتان اور اسکردو کے لیے بھی پروازیں چلانے کا منصوبہ ہے، جبکہ کوئٹہ اور اسلام آباد کے درمیان بھی فضائی سروس شروع کی جائے گی۔
یہ بھی پڑھیں: ایئر بلیو کے بیڑے میں مزید تین جدید طیارے شامل کرنے کا فیصلہ
ایئر انڈس کا کہنا ہے کہ آپریشن کی بحالی کے بعد وقت کی پابندی، محفوظ سفر اور مسافروں کو معیاری سہولیات کی فراہمی کو اولین ترجیح دی جائے گی۔
کمپنی نے بتایا کہ دوسرے مرحلے میں متحدہ عرب امارات، سعودی عرب، قطر، کویت اور عمان کے مختلف شہروں کے لیے بین الاقوامی پروازیں شروع کی جائیں گی۔ تاہم تمام بین الاقوامی روٹس متعلقہ سول ہوا بازی حکام کی منظوری سے مشروط ہوں گے۔
ایئر انڈس کے مطابق نئے فضائی بیڑے میں جدید اور ایندھن بچانے والے طیارے شامل کیے جائیں گے، جبکہ بعد کے مرحلے میں چھوٹے علاقائی طیارے بھی بیڑے کا حصہ بنائے جائیں گے تاکہ ملک کے شمالی علاقوں اور چھوٹے شہروں کے درمیان فضائی رابطوں کو مزید بہتر بنایا جا سکے۔
