اسلام آباد(پاک ترک نیوز ) اگست میں لاکھوں پاکستانیوں کو مسلسل تین دن کی تعطیلات سے لطف اندوز ہونے کا موقع ملے گا، کیونکہ 14 اگست جمعہ کو یومِ آزادی کے موقع پر ملک بھر میں سرکاری عام تعطیل ہوگی۔
دو ہزار چھبیس کے کیلنڈر کے مطابق یومِ آزادی جمعہ کے روز منایا جائے گا، جس کے بعد ہفتہ اور اتوار کی معمول کی ہفتہ وار تعطیلات بھی ہوں گی۔ اس طرح پانچ روزہ ورکنگ ویک پر کام کرنے والے سرکاری و نجی اداروں کے ملازمین اور پیر سے جمعہ تک کلاسز لینے والے تعلیمی اداروں کے طلبہ کو مسلسل تین چھٹیاں میسر آئیں گی۔
تاہم یہ سہولت تمام افراد کے لیے نہیں ہوگی۔ ایسے سرکاری و نجی ادارے اور تعلیمی ادارے جہاں پیر سے ہفتہ تک کام یا کلاسز ہوتی ہیں، وہاں ملازمین اور طلبہ کو جمعہ کی سرکاری چھٹی کے بعد ہفتے کے روز دوبارہ معمول کے مطابق حاضر ہونا ہوگا، لہٰذا انہیں تین روزہ تعطیلات نہیں ملیں گی۔
یہ بھی پڑھیں: پہلی بار ٹیکس گوشوارہ جمع کرانے والوں کے لیے بڑی سہولت
پاکستان میں ہر سال 14 اگست کو یومِ آزادی قومی جوش و جذبے سے منایا جاتا ہے۔ اس موقع پر ملک بھر میں پرچم کشائی کی تقریبات، ملی نغمے، ثقافتی پروگرام، ریلیاں، آتش بازی اور دیگر جشن منعقد کیے جاتے ہیں۔
اس سال جمعہ کے روز یومِ آزادی آنے کے باعث پانچ روزہ ورکنگ ویک رکھنے والے لاکھوں پاکستانیوں کو ایک طویل ویک اینڈ میسر آئے گا، جس سے وہ اہلِ خانہ کے ساتھ وقت گزارنے یا سیاحت کا منصوبہ بھی بنا سکیں گے۔
