پیرس ( پاک ترک نیوز) یورپ میں جنگلاتی آگ کی بڑھتی ہوئی تباہ کاریوں کے پیش نظر دنیا کی معروف طیارہ ساز کمپنی ایئربس نے آگ بجھانے کی کارروائیوں میں اپنا کردار مزید مؤثر بنانے کا فیصلہ کیا ہے۔
کمپنی کے چیف ایگزیکٹو گیوم فوری کے مطابق ایئربس اپنے چار انجنوں والے فوجی نقل و حمل کے طیارے کی آگ بجھانے کی صلاحیتوں میں تیزی سے اضافہ کر رہی ہے تاکہ یہ فرانس کی حکومت اور فضائیہ کو جنگلاتی آگ پر قابو پانے کی کارروائیوں میں مؤثر مدد فراہم کر سکے۔
انہوں نے بتایا کہ اس مقصد کے لیے فوجی طیارے میں ایسے نظام شامل کیے جا رہے ہیں جو فضاء سے بڑی مقدار میں پانی یا آگ بجھانے والا مواد متاثرہ علاقوں پر گرانے کی صلاحیت رکھتے ہوں۔
یہ بھی پڑھیں: چین کی 14 یورپی کمپنیوں پر برآمدی پابندی
یاد رہے کہ فرانس اور اسپین کے مختلف علاقوں میں شدید جنگلاتی آگ کے باعث لاکھوں افراد، جن میں مقامی شہری اور سیاح بھی شامل ہیں، اپنے گھر بار چھوڑنے پر مجبور ہو چکے ہیں، جبکہ امدادی ادارے آگ پر قابو پانے کے لیے مسلسل کارروائیاں کر رہے ہیں۔
ایئربس کا کہنا ہے کہ اس منصوبے کا مقصد قدرتی آفات سے نمٹنے کے لیے جدید فضائی وسائل کو مزید مؤثر بنانا اور یورپی ممالک کی ہنگامی امدادی صلاحیتوں کو مضبوط کرنا ہے۔
