پیرس(پاک ترک نیوز) یورپی خلائی ایجنسی (ESA) نے یورپ کے گلیلیو سیٹلائٹ نیویگیشن نظام کو وسعت دینے کے لیے ایئربس اور تھیلز ایلینیا اسپیس کے ساتھ چار نئے سیٹلائٹس کی تیاری کے معاہدے کرلیے ہیں۔
یورپی خلائی ایجنسی کے مطابق دونوں کمپنیوں کو دوسری نسل کے دو، دو سیٹلائٹس تیار کرنے کا ٹھیکہ دیا گیا ہے۔ اس اضافے کے بعد گلیلیو کی دوسری نسل کے سیٹلائٹس کی مجموعی تعداد 16 ہوجائے گی۔ نئے سیٹلائٹس کی فراہمی 2031 میں متوقع ہے، جس کے بعد انہیں خلا میں بھیجا جائے گا۔
معاہدوں کا مقصد یورپ کے سیٹلائٹ نیویگیشن نظام کو زیادہ قابلِ اعتماد، درست اور جدید بنانا ہے۔ نئے سیٹلائٹس میں جدید ڈیجیٹل نیویگیشن نظام، بہتر اینٹینا، جدید ایٹمی گھڑیاں اور سیٹلائٹس کے درمیان براہِ راست رابطے کی سہولت شامل ہوگی۔
