لاہور( پاک ترک نیوز) پنجاب حکومت نے کم داخلوں والے مزید 555 سرکاری اسکول بند کرکے انہیں قریبی سرکاری تعلیمی اداروں میں ضم کرنے کا فیصلہ کر لیا ہے۔
محکمہ اسکول ایجوکیشن کے مطابق ضم کیے جانے والے اسکول ایسے علاقوں میں واقع ہیں جہاں دو کلومیٹر کے اندر پہلے سے ہائی یا ایلیمنٹری اسکول موجود ہیں۔ ان اسکولوں میں طلبہ کی تعداد پانچ سے بھی کم ہے، جبکہ ہر اسکول میں تین اساتذہ تعینات ہیں۔
یہ بھی پڑھیں: پنجاب میں زیرو بیگنگ منصوبے کا آغاز، مستحق گداگروں کی بحالی کا فیصلہ
حکام کا کہنا ہے کہ ان اسکولوں کو نجی شعبے کے حوالے کرنے کے باوجود طلبہ کے داخلوں میں خاطر خواہ اضافہ نہیں ہو سکا، جس کے بعد انہیں ضم کرنے کا فیصلہ کیا گیا ہے۔اس اقدام کے بعد پنجاب میں سرکاری اسکولوں کی مجموعی تعداد کم ہو کر تقریباً 37 ہزار رہ جائے گی۔
صوبائی حکومت اس سے قبل بھی اپنے آؤٹ سورسنگ پروگرام کے تحت 13 ہزار سرکاری اسکول نجی شعبے کے حوالے کر چکی ہے۔ حکام کے مطابق ان اقدامات کا مقصد تعلیمی وسائل کا مؤثر استعمال، بہتر انتظام اور تعلیمی معیار میں بہتری لانا ہے۔
