لاہور( پاک ترک نیوز) پٹرولیم لیوی اور مہنگائی کے خلاف جماعت اسلامی کے دھرنوں کا سلسلہ ستائیسویں روز بھی جاری ہے، جماعت اسلامی نے احتجاجی تحریک کو مزید تیز کرنے کا فیصلہ کرلیا۔امیر جماعت اسلامی حافظ نعیم الرحمان نے مرکزی قیادت کو منصورہ طلب کرلیا ہے، مرکزی قیادت کا اہم اجلاس آج حافظ نعیم الرحمان کی زیرصدارت ہوگا۔
اجلاس میں پٹرولیم لیوی اور مہنگائی کے خلاف جاری تحریک کے آئندہ کے لائحہ عمل پر غور کیا جائے گا، جبکہ احتجاجی تحریک کو مزید مؤثر بنانے اور لانگ مارچ سے متعلق اہم فیصلے متوقع ہیں۔جماعت اسلامی کی قیادت ملک میں بڑھتی ہوئی مہنگائی اور پٹرولیم مصنوعات پر عائد لیوی کے خلاف پہلے ہی احتجاجی دھرنے دے رہی ہے، اب احتجاج کا دائرہ مزید وسیع کرنے پر بھی غور کیا جائے گا۔دوسری جانب حافظ نعیم الرحمان آج گوجرانوالہ میں جلسے سے خطاب کریں گے، جہاں وہ پٹرولیم لیوی اور مہنگائی کے خلاف تحریک کے آئندہ مرحلے کا اعلان کریں گے۔
یہ بھی پڑھیں: وزیراعلیٰ مریم نواز سے ساہیوال کے ارکان اسمبلی کی ملاقات
ذرائع کے مطابق امیر جماعت اسلامی گوجرانوالہ جلسے میں حکومت کے خلاف لانگ مارچ کی تاریخ کا بھی اعلان کریں گے، جس کے بعد جماعت اسلامی کی احتجاجی تحریک مزید شدت اختیار کرسکتی ہے۔
